دليل أحداث نهاية الأسبوع: حفلات كبرى بالأوبرا واستمرار فعاليات دي كاف
Cairo 360
ويك إند جديد والجو بدأ يتحسن ثاني بعد هوجة الرياح والتراب اللي كانت
أول الأسبوع، والهدوء والتحسن النسبي في الطقس ده معناه خروج أكثر وفسح أمتع،
والأسبوع ده عندنا كام حفلة موسيقية على كام عرض مسرحي على معارض فنية على فنون
معاصرة، أحداث تناسب كل الأذواق كالعادة.
بـ نفكركم قبل ما نتكلم عن الأحداث الثقافية بأننا زرنا كام مكان ظريف، زي
كافيه «بريد باسكت» في المهندسين اللي بـ يعمل وجبات أفطار
ومخبوزات عظيمة ومناسب جدًا للناس اللي بـ تفطر في الشغل، وده عملناه مخصوص علشان
الناس اللي بـ تشتغل أيام الجمعة والسبت ما تزعلش مننا. وفيه مطعم «بحري» للسي فوود اللي في
مدينة نصر، وينفع لخروجة وأكلة سمك متينة بعد الظهر.
أول حدث مهم الأسبوع ده هو عرض باليه بحيرة البجع
الليلة دي على المسرح الكبير بدار الأوبرا المصرية، الحفل هـ يبدأ الساعة 8 مساءً
وهـ تقدمه فرقة باليه أوبرا القاهرة. الحق احجز تذكرتك.
فعاليات مهرجان D-Caf الثقافي مستمرة على مسارح ومراكز
ثقافية في وسط البلد، والنهاردة فيه ورشة عمل
عن الكتابة للمسرح والتخيلات وتدخلاتها في العمل الفني، الورشة هـ تبقى في ستوديو
عماد الدين والدعوة عامة، يعني الدخول مجانًا.
في فندق باساج القريب من مطار القاهرة في مصر الجديدة
فيه عرض بعنوان Dance Relief ، دعوة للرقص
على موسيقى دي جي توي بويز ودي جي ميستي ودي جي حافظ، تذكرة الدخول بـ 275 جنيه،
والحجز من خلال موقع تذكرتي.
وعلى المسرح الصغير في دار الأوبرا النهاردة فيه ريستال غنائي للفنانة آية شلبي.
وفي قاعة الحكمة في ساقية الصاوي وبما أن ده الخميس
الأول في الشهر، ميعادنا مع عرض أم كلثوم
وفرقتها على مسرح الساقية العرائس، ومجموعة من أجمل أغانيها. التذاكر متوفرة فى
شباك الحجز.
في المركز الثقافي الإيطالي هـ يتم عرض المسلسل الإيطالي
القصير “لي كوز شي ريستانو” اللي
بـ يرصد 2000 عام من التاريخ الإيطالي من خلال دراما اجتماعية. الدخول مجانًا.
عرض مايك مفتوح بعنوان “فك
نفسك” مع مجموعة (الحزب الكوميدي) في “مكان” في وسط
البلد الليلة دي، دعوة للضحك والتهريج، التذكرة بـ 30 جنيه من على البوابة و20
جنيه لو حاجز من قبلها.
روائع الموسيقى العربية
بقيادة المايسترو عبد الحليم نويرة وبمصاحبة الفنان صفوان بهلوان على المسرح
الكبير يوم الجمعة بدار الأوبرا.
فرقة فوق السطوح لموسيقى
الجاز والفيوجن بـ تحتفل بعيد ميلادها الأول في ساقية الصاوي يوم الجمعة بحفل في
قاعة الحكمة.
ولمعشر موسيقى الميتال فيه حفلة قوية جدًا في ساقية
الصاوي يوم الجمعة في قاعة النهر هـ يكون فيها فرق Wyvern وKarma والحفل من ضمن حفلات مهرجان ميتال بلاست لموسيقى الميتال Heavy Metal.
يوم السبت على المسرح الكبير ميعادنا مع أوركسترا القاهرة السيمفوني على المسرح الكبير في
دار الأوبرا المصرية.
أوركسترا من نوع آخر على مسرح راديو في وسط البلد ضمن
فعاليات مهرجان D-Caf، أوركسترا ناسيبيسان
للموسيقى الرقمية، فكرة جديدة جديرة بالمشاهدة، والتذاكر بـ 30 و20 جنيه وخصم خاص
للطلاب.
وفي قاعة النهر بساقية الصاوي حفلة أصبحت شبه شهرية وهي حفل فريق كايروكي، والمرة دي معاهم الشاعر زاب ثروت
اللي ظهر معاهم في عدد من أغانيهم المصورة.
عدد كبير من المعارض الفنية وعروض الفنون المعاصرة زي
عرض (جورو جورو) وساحة الحكايات ضمن فعاليات مهرجان وسط البلد D-Caf وغيرها
كثير ممكن تتابعوها من خلال أجندة موقعنا
وأكيد هـ تلاقوا عندنا 100 فكرة ثانية لحاجات تعملوها في أوقات فراغكم.
استمتعوا..
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
