دليل أحداث نهاية الأسبوع: أجازة طويلة وحفلات موسيقية كثيرة ولقاءات ثقافية
Cairo 360
أجازة طويلة أخيرًا، بـ نستنى كل كام شهر علشان تيجي مناسبة أو عيد قومي
يخلينا نلضم الأيام في بعضها ونطلع نغير جو في أي حتة! دائمًا بـ نرتب خطط للسفر
أو بـ ننتهز الفرصة ونقضي أكثر وقت ممكن مع عائلاتنا أو ساعات بـ تبقى فرصة للنوم
الطويل والعميق مش أكثر. لو كنت هـ تعمل حاجة من الـ 3 حاجات اللي ذكرناهم يبقى
المقال ده مش لك، أولاً لأننا هنا بـ نتكلم عن حاجات تتعمل ومحتاجة طاقة وخروج
وتنطيط، وثانيًا لأن الحاجات دي كلها موجودة في كايرو. بس ده ما يمنعش أنك تقسم
وقتك بين العائلة والفسيخ والعين السخنة وبين كام حفلة موسيقية وعروض فنية
وثقافية؛ غذاء الروح يعني.
النهاردة وبكرة (خميس وجمعة) فيه حفل الموسيقار
الكبير عمر خيرت على المسرح الكبير بدار الأوبرا، نفس الحفل بـ يتكرر
ليلتين متتاليتين نظرًا للإقبال غير العادي، اتصل بدار الأوبرا وأعرف لو لسه فيه
تذاكر للنهاردة أو لبكرة.
ولهواة موسيقى الجاز أو آلة الدرامز ميعادكم النهاردة
برضه مع حفل الفنان أحمد ربيع عازف الدرامز
وهـ يقدم مجموعة من مقطوعاته الخاصة من موسيقى الفيوجن جاز والمجال مفتوح لتوجيه
أسئلة للفنان في الفواصل. الحفل على المسرح المكشوف في دار الأوبرا.
وعلى المسرح الصغير بدار الأوبرا هـ تقدم أوركسترا القاهرة السيمفوني حفل هـ تلعب فيه مجموعة
من أشهر الأعمال لكبار المؤلفين منهم موتسارت وبرامز وغيرهم. وهـ تقدم حفل ثاني
على المسرح الكبير يوم السبت.
أحمد الحجار ابن الفنان الكبير علي الحجار هـ يعمل حفلة
النهاردة في ساقية الصاوي بقاعة الحكمة بمصاحبة فرقته الموسيقية. بـ يقدموا أغاني
مصرية بقوالب موسيقية متنوعة منها الشرقي واللاتيني. الحفل هـ يبدأ الساعة 8 مساءً.
في أفتر إيت After 8 الليلة دي فرقة سلالم هـ
تلعب الساعة 9 مساءً والحد الأدنى للطلبات هنا 100 جنيه. ويوم السبت كمان هـ تلعب
في كايرو جاز كلوب Cairo Jazz Club والحجز مطلوب قبلها.
فرقة مسرح الطمي اللي بـ تقدم أغاني تراثية بشكل درامي
مبتكر هـ تقدم عرض الليلة دي على مسرح ساحة روابط للفنون بوسط البلد والعرض بعنوان
مد وجزر. ادخل على اللينك واعرف تفاصيل
أكثر عن العرض.
الفنان الشاب هيثم نبيل
هـ يحيي حفل الربيع في ساقية الصاوي يوم الجمعة الساعة 8 مساءً بقاعة النهر، وسعر
التذكرة 30 جنيه. هيثم نبيل طرح ألبومه في توقيت صعب في بداية سنة 2011 وإحنا في
كايرو 360 كتبنا عنه مقال نقدي وتوقعنا أن هيثم يحقق نجاحات كبيرة بمجرد ما الأمور
تستقر في البلاد.
وفي قاعة الحكمة في الساقية فيه حفل للعزف على الهارمونيكا للفنان المجري جورجي
فيرينازل بالتعاون مع القنصلية المجرية في مصر. الحفل بـ 20 جنيه وبـ 15 جنيه
لأعضاء الساقية.
في مركب تريانون في الجيزة وبالتحديد في «التيسيمو – Altissimo» فيه حفل صباحي مميز جدًا وبوفيه مفتوح، وهـ يحيي الحفل الفنان أحمد حرفوش المشهور بتقديم أغاني الجاز القديمة
والخاصة بمسارح برودواي الأمريكية، الحجز مطلوب.
لو بـ تحب موسيقى الفلامنكو ممكن تحضر حفل لفرقة «نمرة 6» في الساقية يوم السبت، موسيقى
الفلامنكو ممزوجة بالنغمات الشرقية أكيد هـ تعجبكم.
فرقة Redeemers من أحسن الفرق اللي بـ تقدم
موسيقى الـ Heavy Metal في مصر، شوفوهم في قاعة الحكمة بساقية الصاوي
يوم السبت الساعة 8 مساءً.
للأسبوع الثالث لو رجلك مشيت بك ناحية وسط البلد ممكن تستمتع
بعروض مهرجان D-Caf المستمرة للأسبوع الثالث، ممكن تحضر عروض على مسرح راديو أو عماد
الدين أو الفلكي. تابع عروض المهرجان الفنية والمسرحية والموسيقية من خلال أجندة موقعنا.
حفلات دار الأوبرا الخاصة بأعياد الربيع هـ تبدأ من يوم
الجمعة ومن ضمنها حفل أغاني أفلام والت ديزني
اللي بـ يقدمه كورال الأطفال على المسرح بمصاحبة شخصيات ديزني مجسمة بشكل ثلاثي
الأبعاد. العرض بمناسبتين مع بعض هم أعياد الربيع ويوم اليتيم وهـ يستمر لمدة 4
ساعات على المسرح المكشوف.
يوم الاثنين يوم شم النسيم ممكن تحضر حفل فرقة صحرا في وكالة الغوري بحي الأزهر الساعة 7
مساءً، وممكن حفلة ثانية لمطربة لبنانية اسمها جانو هـ تقدم مجموعة من أغاني
فيروز وصباح في ساقية الصاوي الساعة 8 مساءً.
ندوات ولقاءات ثقافية مهمة في الأجازة دي زي ندوة الدكتور علاء الأسواني في ساقية الصاوي النهاردة،
والدعوة عامة. وندوة ثانية بعنوان «معركة لسان التمساح» في مركز طلعت حرب الثقافي ودي
للحديث عن أحد معارك حرب أكتوبر المجيدة.
وعدد من العروض المسرحية والمعارض الفنية، طبعًا كله
موجود على موقعنا لكن حاولنا في المقال ده نلقي الضوء على أهم الحاجات اللي ممكن
تتعمل في الويك إند الطويل اللي جاي.
نشوفكم بعد الأجازة.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
