The Definitive Guide to Living in the Capital , Cairo , Egypt

الويك إند المرة دي محتاج دراسة جدوى علشان نعرف نحدد الخروجات اللي هتبسطنا، لإن زي ما احنا عارفين إن الويك إند ده هو الباور اللي هيخلينا نكمل حياتنا ويفصلنا عن ضغط الأسبوع. تعالوا مع بعض نشوف أهم الفاعليات اللي ممكن نحضرها:

الخميس.. ولأول مرة في مصر دار الأوبرا المصرية هتستضيف الساعة 8 بالليل عرض “باليه كليوباترا” بمصاحبة أوركسترا الأوبرا المصرية. أسعار التذاكر 85 و110 و160 جنيه.

ممكن نفصل الموود بحفلة شاملة كاملة مع “ميكروفون” الساعة 7 بالليل في بيت السناري. الحفلة هيكون فيها لعب مزيكا وغناء ورقص وشعر وكمان مجانًا وبدون دعوات.

على الساعة 8 بالليل هيكون فيه حفلة تانية بس المرة دي هتقدمها فرقة “الإخوة أبو شعر” للإنشاد الصوفي في دار الأوبرا. سعر التذكرة 85 جنيه.

 يوم الجمعة.. هواة الدرامز وموسيقى الجاز هنتقابل الساعة 7:30 مع الموسيقار الكبير “يحي خليل” في حفلته الجديدة في دار الأوبرا. سعر التذكرة 160 جنيه.

أما الساعة 8 ولمدة ساعتين هنكون في حفلة موسيقية خاصة هتقدمها فرقة “Sweet Sound Band” بقيادة الدكتور “منير نصر الدين” في دار الأوبرا المصرية. سعر التذكرة 110 جنيه.

ساقية الصاوي كمان هيكون فيها حفلة تواشيح وابتهالات دينية الساعة 7:30 مع الشيخ “إيهاب يونس“. سعر التذكرة 57 جنيه.

يوم السبت.. آخر أيام الويك إند، ولازم يكون مميز، علشان كده الساعة 9 بالليل هنروح نضحك شوية في “مسرحية المتفائل” الكوميدية الغنائية. العرض هيتقدم على المسرح القومي والتذاكر أسعارها 30 و50 و70 و100 جنيه.

أما السهرة فهتكون في “روم آرت سبيس” فرع جاردن سيتي مع فرقة “حرفوش للجاز” اللي هتقدم حفلة مميزة الساعة 9 بالليل، بتذكرة سعرها 100 جنيه.

وكمان ممكن نحضر حفلة المطربة الصاعدة “أماني حسن” اللي أبهرت الناس بحفلاتها وصوتها في ساقية الصاوي الساعة 6 مساءً، وسعر التذكرة 60 جنيه.