دليلك لويك إند سعيد: مش هتقدر تقاوم أحداث السنة دي
Cairo 360
سنة جديدة بدأت والكل بيتمنى أنها تكون أجمل من السنة اللي قبلها، بس الأكيد أن كل يوم بيعدي علينا من غير ما نتعلم حاجة جديدة فهو يوم ضايع، علشان كده أجندة #كايرو_360 بنوفر لكم أحداث مختلفة تعرفكم على تجارب وفنون جديدة.
نبدأ بالنهارده الخميس، وحفل مختلف في علبة ألوان بالزمالك وهو حفل غنائي للثنائي “هنا غنيم” و”أمير كامل”. واللي هيقدموا مجموعة من أغاني الكريسماس المتنوعة. سعر التذكرة: 60 جنيه. كمان فرقة الطنبورة البورسعيدية عاملة حفل غنائي على مسرح الضمة بعابدين، وسعر التذكرة: 30 جنيه. أما لمحبي الكلاسيكيات ففرقة أوبرا القاهرة عاملة أمسية مع موتسارت وبوتشينى ومؤلفات أخرى فى “ميدان الأوبرا” على مسرح الجمهورية بعابدين. وسعر التذكرة: 10 – 15 – 25 جنيه. كمان فريق Paranoid Eyes عامل حفل غنائي في مدار بالمعادي. ويقدم مجموعة من أغاني فريق “بينك فلويد”. وسعر التذكرة: 50 جنيه. أما لمحبي الفن التسعيناتي فالفنان هاني شاكر له حفل غنائي على مسرح أوبرا جامعة مصر للعلوم والتكنولوجيا. بمصاحبة أوركسترا المايسترو سليم سحاب. وسعر التذكرة من 250 حتى 400 جنيه.
وننتقل ليوم الجمعة، كمان فيه حفل غنائي لفرقة الحضرة في مركز الربع الثقافي بشارع المعز. وسعر التذكرة: 40 جنيه. أما في بلكون هليوبوليس بمصر الجديدة هيعرضوا الفيلم الكندي “Café de Flore”. وهو ملحمة خيالية عن الحب بكل أشكاله. وسعر التذكرة: 25 جنيه. برضه بينظم موقع “سبايرال ماج” ومنظمة “آرت خانة” حفل غنائي في مساحة رووم للفنون، بعنوان “إعادة الإيقاع”. وسعر التذكرة: 50 جنيه. ولمحبي الأفلام المترجمة مكتبة مصر الجديدة عاملة ندوة “ترجمة الأعمال السينمائية والتليفزيونية إلى العربية”. واللي هيقدمها الدكتور ستار سعيد زويني. والدعوة عامة.
ونختم بيوم السبت، وحفل لفرقة أسياد الزار واللي بيقدموا الزار البلدي على مسرح الضمة بعابدين. سعر التذكرة: 30 جنيه. كمان فيه في مساحة رووم الفيلم الأمريكي “Memento”. واللي بيدور عن شخص يعيش بذاكرة قصيرة المدى. ويتبع العرض مناقشة الفيلم. سعر التذكرة: 25 جنيه. ولعشاق الأوبرا هتلاقوا على المسرح الصغير بدار الأوبرا المصرية، بث مباشر لأوبرا “نابوكو” لفيردي. من أوبرا المتروبوليتان. سعر التذكرة: 100.
لو عاوزين تعرفوا أكثر عن الأحداث اللي بننشرها كل يوم على مدار الشهر تابعوا أجندتنا.
ويك إند سعيد عليكم!
