The Definitive Guide to Living in the Capital , Cairo , Egypt

زينة رمضان مالية الشوارع والأطفال اللي في الأجازة منطلقين لعب لحد وقت السحور، وكل البلكونات في العمارات معلقة الفوانيس. فطبيعي أن كتير من الأماكن برضه تحتفل بالشهر الكريم بطريقتها.

ونبدأ بالنهارده يوم الخميس، وحفل خاص لـ فرقة الطنبورة البوسعيدية على مسرح الضمة، وسعر التذكرة 30 جنيه.

أما في دكة أضف ففيه حفلة لميكروباص باند اللي بيفتتح برنامج رمضان في دِكّة ولكن المرة دي مع فريق Cairo Killers في سهرة رمضانية تمزج ما بين موسيقى الروك والراب والموسيقى الشرقية، والدخول مجاني.

كمان في قصر الأمير طاز فيه حفل المولوية المصرية هتستمتعوا معاهم بجو فلكلوري مختلف، والدخول مجاني.

ولو عاوزين تجربوا سحور مختلف مع ألعاب وموسيقى يبقى مكانكم في يالو أمبريلا، وبتدفعوا 30 جنيه بس بالمشروبات.

وننتقل ليوم الجمعة، وأوزوريس في جاردن سيتي عاملة ليلة رمضانية خاصة وسط حفل الشيخ زين محمود، والحجز بيكون عن طريق إرسال رسالة خاصة لهم على صفحتهم على الفيسبوك هنا.

وبرضه علبة ألوان ماحبتش تحرم محبين باسم يوسف من العرض التاني للفيلم الوثائقي اللي بيعرض حكاية وهو “Tickling Giants”، وسعر تذكرة الحضور 50 جنيه.

أما في رووم أرت سبيس ففيه ليلة مع موسيقي الجاز و فريق شادي القصير في رووم، والحفلة هتضم مجموعة من أشهر مقطوعات الجاز بالإضافة لمؤلفات عازف الساكسفون المصري شادي القصير، وسعر التذكرة 50 جنيه.

وفي قصر الأمير طاز هتلاقوا حفل لمحمود التهامي واللي بيقدم فيه قصائد من التراث بطريقة جميلة وجذابة، والدخول مجاني.

ونختم بيوم السبت، وعرض أسياد الزار على مسرح الضمة واللي بيعرضوا أغاني مستوحاة من الزار وتراث زمان، وسعر التذكرة 30 جنيه.

كمان في قصر الأمير طاز فيه حفل لأوركسترا بيت العود هتستمعوا معاهم بعزف من عالم تاني، والدخول مجاني.

ولو عاوزين تستمتعوا بعرض مختلف ففروم أرت سبيس فيه عرض لايف لفرقة استبينا، واللي مكونة من عازفين من كل أنحاء العالم.

خلصت أحداثنا لأجازة نهاية الأسبوع بس أكيد ما انتهتش الخدمات اللي بنقدمها لكم واللي تقدروا تتباعوها كل يوم من خلال موقعنا.