The Definitive Guide to Living in the Capital , Cairo , Egypt

وصلنا لأهم يوم في الأسبوع، علشان بعد الشغل والفرهدة والتعب، محتاجين شوية انبساط. يلا بينا على حفلات الويك إند:

النهارده الخميس هيكون ميعادنا مع حفلة غنائية للفنانة النوبية “مرام“. الحفلة في ساقية الصاوي وهنسمع فيها أحلى أغاني التراث النوبي.

معهد جوتة في الدقي، هيكون فيه حفلة غنائية هيحييها فريق “زجزاج“. الدخول هيكون مجاني لحد اكتمال العدد.

فريق “The Sinatras” هيكون موجود في رووم آرت سبيس. وهيقدم أجمل أغاني الفنان الراحل فرانك سيناترا.

يوم الجمعة هيكون لنا لقاء مع الفنان “هشام خرما“، في احتفاله بإصدار ألبومه الجديد “كُن”. الحفلة هتكون في ساقية الصاوي فرع البروج.

علبة ألوان هتستضيف حفلة تسعيناتي، اللي هيقدمها الفنان “حسام حسني“. وهنسمع فيها أجمل أغاني التسعينات.

ضمن فعاليات مهرجان “دي كاف”، الجريك كامبس هيكون فيها حفلة بيحييها (أبيوسف – ويجز – 3 فاز). وهتبدأ الساعة 8 مساءً.

نروح ليوم السبت، وسينما زاوية في وسط البلد هيكون فيها فيلمين: (فردي)، (حار جاف صيفًا). العرض هيبدأ الساعة 7 مساءً، وسعر التذكرة: 40 جنيه.

شوية ضحك وفرفشة هتستمتعوا بيهم، مع عرض “استاند أب كوميدي” في 9 شارع عدلي في وسط البلد.

أما اللي غاويين جاز ومزيكا، استنوا فريق “Circle of Four” هيقدم حفلة جاز في رووم آرت سبيس.

كل ده وحفلات تانية أكتر هتلاقوها في أجندة كايرو 360 من هنا.