The Definitive Guide to Living in the Capital , Cairo , Egypt

لما يكون كل يوم شبه التاني في الشغل يبقى لازم يوم أجازتك تعمل حاجة مختلفة تخرج بيها من روتين حياتك، وهتلاقي كل الأحداث المختلفة دي في أجندة #كايرو_360. أما لو عاوز تقضي ويك إند سعيد فعلًا فتابع دليل أحداثنا اللي أحداثة متميزة عن أي مكان تاني.

نبدأ بيوم الخميس، نبدأ بـ عرض مسرحي بعنوان "الوالي"من تقديم فرقة فرسان الشرق للتراث على مسرح الجمهورية، وأسعار تذاكر الحضور 15،25،35 جنيه. أما على مسرح الضمة ففيه حفل لفرقة "مزامير النيل" واللي بتقوم بتقديم الفن الصعيدي للجمهور، وسعر التذكرة 30 جنيه. وفي "دكة أضف" بالمقطم التابعة لمؤسسة التعبير الرقمي العربي "أضف" فيه أمسية غنائية لمجموعة "أنتيكا"، والدعوة عامة. كمان سينما زاوية بوسط البلد في الفترة ما بين 13 أكتوبر و 18 أكتوبر  فيها مجموعة عروض لأفضل أفلام المخرج الراحل محمد خان، وسعر تذكرة الحضور 25 جنيه لكل عرض.

وننتقل ليوم الجمعة، وعلى مسرح الهوسابير  فيه عرض مسرحي بعنوان "البروفة" يقدمها فريق العرض المسرحي الشبابي الشهير "1980 وأنت طالع"، وسعر التذكرة 25 جنيه. أما على مسرح قاعة النهر بساقية الصاوي ففيه حفلتين لفرقة مسار إجباري، الحفل الأول يبدأ في الساعة 4 والثاني الساعة 8، وسعر تذكرة الحضور 60 جنيه. وعرض مختلف على مسرح الجنينة في حديقة الأزهر  هيكون عرض غنائي مسرحي باسم "كوكب الشرق"، والعرض بيتناول بعض محطات حياة الراحلة العظيمة أم كلثوم بصورة استعراضية كوميدية، ودخول المسرح مجاني، غير شامل تذكرة دخول الحديقة. أما في مركز الربع الثقافي بشارع المعز فيه حفل ثنائي لمشروع سرور مع فرقة هوس، وسعر تذكرة الحضور 50 جنيه.

ونختم بيوم السبت، وفي مركز الربع الثقافي بشارع المعز فيه  حفل للإنشاد الصوفي المصري هتقدمه فرقة "الحضرة"، وسعر التذكرة 40 جنيه. وعلى مسرح الجنينة بحديقة الأزهر فيه حفل لفرقة "أورانج بلوسوم"، وسعر تذكرة الحضور 30 جنيه غير شاملة تذكرة دخول الحديقة. كمان فيه في القاعة الكبرى بدار الأوبرا المصرية حفل موسيقي للموسيقار مينا جابرييل مع أوركسترا القاهرة السيمفوني.

لو عاوزين تعرفوا أكثر عن الأحداث اللي بننشرها كل يوم على مدار الشهر، تابعوا أجندتنا.

ويك إند سعيد!