دليلك لويك إند سعيد: حفل الحضرة ومصطفى عاطف وعلي الهلباوي
Cairo 360
كل الناس بتستعد لأجازة العيد، اللي بيشتري اللي ناقصه واللي بيخلص ورق، واللي بيجهز للسفر، ويبقى القلة المندسة اللي قررت تقضي العيد في القاهرة وما تخرجش في الزحمة، فرصتكم اهيه تخرجوا قبل العيد، اوعوا تضيعوها بقى.
نبدأ بيوم الخميس النهارده، وحفل "فرقة الحضرة" في مسرح الجنينة بحديقة الأزهر، وسعر تذكرة الحضور 30 جنيه. كمان مركز المصطبة للفنون الشعبية ومسرح الضمة مستضيفين حفل "لفرقة دراويش أبو الغيط" لفن الزار التراثي، وسعر التذكرة 30 جنيه. أما ساقية الصاوي عاملة حفل للإنشاد الديني للمنشد مصطفى عاطف، سعر الت1كرة 30 جنيه. بس لو بتحب المسرح فيه عرض مسرحي بعنوان "قابل للكسر" في مسرح مكتبة مصر الجديدة، وسعر تذكرة الحضور 20 جنيه. وفي أوزيريس آرت سبيس فيه عرض لفيلم "باب الوداع" هيكون بعده ندوة نقاشية مع أصحاب العمل وبعض المشاركين فيه، والدعوة عامة.
وننتقل ليوم الجمعة، وحفل لموسيقى الجاز مع Michelle Rounds Project في روم آرت سبيس بجاردن سيتي وسعر تذكرة الحضور 50 جنيه. ولعشاق المديح والموال ماتفوتوش على مسرح قاعة النهر بساقية الصاوي حفل الفنان علي الهلباوي، وسعر التذكرة 40 جنيه. أما على مسرح الفلكي بالجامعة الأمريكية في التحرير فيه عرض مسرحي "وإيه يعني" لفرقة "أبيض وأسود" المسرحية، وسعر تذكرة الحضور 30 جنيه. كمان "أولدش" كافيه بوسط البلد عامل حفل عشاء وعود بعنوان "ليالي الأنس في أولدش"، مع عازف العود "أحمد نبيل".
ونختم بيوم السبت، وفي روم آرت سبيس في جاردن سيتي فيه أمسية للعب ألعاب الطاولة بأنواعها، والحد الأدنى للطلب 35 جنيه. كمان في دار الأوبرا المصرية فيه حفل موسيقي لأوركسترا القاهرة السيمفوني، واللي هتقدم معزوفات كلاسيكية عالمية، وسعر تذكرة الحضور تبدأ من 15 جنيه للطلبة، و25 لغيرهم. ولعشاق الكتب مركز الربع الثقافي بشارع المعز فيه معرض للكتاب هيضم كتب جديدة ومستعملة في مجالات مختلفة، وهتستمر فعاليات المعرض حتى منتصف سبتمبر، وهو فاتح كل يوم خلال فترة إقامته من الساعة 10:00 الصبح لحد الساعة 10:00 بليل.
لو عاوزين تعرفوا أكثر عن أحداثنا اللي بننشرها كل يوم على مدار الشهر، تابعوا أجندتنا.
