The Definitive Guide to Living in the Capital , Cairo , Egypt

فاضل أقل من 10 أيام وتخلص أيام شهر الخير، حاولنا نجمع لكم أفضل الأحداث اللي تساعدكم تستمتعوا بالشهر الكريم، وتشعروا بالسكينة والراحة.

نبدأ بالنهارده يوم الخميس، حفل الشيخ ياسين التهامى فى المسرح المكشوف في دار الأوبرا المصرية، وسعر التذكرة 50 جنيه.

كمان فرقة مزامير النيل، هتقدم حفل غنائي على مسرح الضمة في عابدين. وسعر التذكرة: 30 جنيه.

وهتلاقوا في قاعة الحكمة بساقية عبد المنعم الصاوي، الحفل الأول لفرقة رترو في ساقية عبد المنعم الصاوي، الساعة 9:30، وسعر التذكرة 35 جنيه لأعضاء الساقية و40 جنيه لغير الأعضاء.

أما لعشاق الموسيقى اللي بتمس الروح الموسيقار عمر خيرت هيحيي حفلة موسيقية على مسرح الماركيه في كايرو فستيفال سيتي. وسعر التذكرة من 400 لـ 750 جنيه.

وننتقل ليوم الجمعة، ومحبي الإنشاد الصوفي على ميعاد مع فرقة مولاي في ساقية عبد المنعم الصاوي واللي هتحيي حفل مميز الساعة 9:30، في قاعة الحكمة وسعر التذكرة 30 جنيه لأعضاء الساقية و35 جنيه لغير الأعضاء.

كمان فيه حفل للفنان على الهلباوى على المسرح المكشوف في دار الأوبرا المصرية، وسعر التذكرة 50 جنيه.

أما لمحبي الفنون المختلفة، الفنان طه دسوقي هيقدم عرض ستاند أب كوميدي، على مسرح الضمة في عابدين. سعر التذكرة: 30 جنيه.

وبرضه  لمحبي الغناء، أحمد هواري وريم عبد الوهاب، هيتجمعوا في حفلة غنائية في مجنوليا. وسعر التذكرة: 25 جنيه.

ونختم بيوم السبت، وفي قاعة الحكمة في ساقية عبد المنعم الصاوي، هتقوم فرقة وصلة سماع بحفل إنشاد ديني، يزود من الإحساس بسكينة الشهر الكريم، وسعر التذكرة 30 جنيه.

كمان  فيه حفل للفنان عز الأسطول على المسرح المكشوف في الأوبرا المصرية، واللي هيقدم  أغانى عربية وراى، وسعر التذكرة 35 جنيه.

برضه فرقة التنورة التراثية هتقدم عرض التنورة الفلكلوري، في وكالة الغوري. وسعر التذكرة: 5 جنيه.

وأخيرًا مي عبد العزيز هتحيي حفلة غنائية،  في مساحة باب 18 في مصر الجديدة.

لو عاوزين تعرفوا أكثر عن الأحداث اللي بننشرها كل يوم على مدار الشهر تابعوا أجندة كايرو 360.

ويك إند سعيد!