The Definitive Guide to Living in the Capital , Cairo , Egypt

الويك إند في أجندتنا 3 أيام فسح وخروج وانبساط وفرفشة، ودايمًا هنكون معاك علشان نقولك أحلى الخروجات والسهرات في القاهرة، تعالى نشوف الويك إند ده هيحصل فيه إيه.

النهارده الخميس.. وأول خميس من كل شهر معادنا في مسرح ساقية الصاوي للعرائس علشان نستمتع بحفلة لـ”أم كلثوم“. الخميس ده في حفلتين لـ “أم كلثوم” هتغني فيهم “الحب كده” و”بعيد عنك”. الحفلة الأولى هتبدأ الساعة 6.

الساعة 8 مسرح “النهار” هيرفع الستار عن العرض المسرحي “الجميلة والوحش” اللي يعتبر أول عرض مسرحي كوميدي غنائى استعراضى فى مصر. أسعار التذاكر: 30 – 50 – 75 – 100 جنيه.

بيت السناري في السيدة زينب، وبالتعاون مع الفنان والموسيقار “ايسوناس بساراكيس” هينظموا حفلة موسيقية مفتوحة للجمهور بعنوان “روائع السِّيتار الهندية” وهي آلة موسيقية هندية شبه العود. الحفلة هتبدأ 8 بالليل.

يوم الجمعة.. رووم آرت سبيس فرع التجمع هيستضيف “دعسوقة” باند الساعة 9 بـ 100 جنيه التذكرة، أما فرع “رووم آرت سبيس” في جاردن سيتي فهيستضيف الثنائي “كيكومان” وهو ثنائي موسيقي جديد هنسمع منهم مزيج موسيقي رائع وجديد. سعر التذكرة: 100 جنيه. 

تعالى واستمتع وطبل الساعة 7:30  في “دايرة الطبول” مع “مصطفى بكار” في “مركز جسور”. لو مش معاك طبلة المكان هيوفرلك وحده. سعر التذكرة : 50 جنيه لو المكان هيوفرلك طبلة، و 35 جنيه لو معاك طبلة.

لو بتصحى بدري، يبقى ممكن تلحق الرايد اللي هتنظمه “يالا عجلة” الساعة 7 الصبح وهيلف مصر الجديدة بالعجلة. التذكرة بتبدأ من 60 جنيه شاملة رسوم ايجار العجلة.

يوم السبت.. هتبدأ فعاليات مهرجان ساقية الصاوي الـ 15 للتمثيل الصامت “مايم“. سعر التذكرة: 30 جنيه لعروض اليوم الواحد. العروض هتبدأ الساعة 6. 

أو الساعة 6 برده ممكن تتفرج على الفيلم الامريكي “? Won’t You Be My Neighbor” ضمن برنامج “سيما دكة بدماغك” اللي بتنظمه “دكة أضف” لشهر أغسطس، والدخول مجانًا.

أما الساعة 7:30 فهنتقابل في بيت السناري علشان نستمتع بموسيقى وأغاني مختلفة مع “جنوبيان” باند اللي جايه من قلب الصعيد الجواني. الحضور مجانًا.

الويك إند مش كام إيفنت وخلاص، الويك إند مع كايرو 360 يعني أسلوب حياة.. إعرف أكتر عن أجندتنا من هنا.