The Definitive Guide to Living in the Capital , Cairo , Egypt

اليوم اللي بيعدي مش هيرجع تاني، وفي إيدك أنك تخليه مختلف أو أنه يكون يوم عادي زي أي يوم في الأسبوع، ماتضيعش فرصة أنك تجرب حاجة أول مرة تعملها أو ماعملتهاش بقى لك فترة واستمتع بحاجة جديدة في الويك إند ده. تعالوا نعرف أهم الأحداث اللي هتحصل في القاهرة اليومين دول.

ونبدأ بالنهارده يوم الخميس، وحفل غنائي على مسرح الضمة بعابدين لفرقة الوزيري الاسمعلاوية. وسعر التذكرة: 30 جنيه. أما لو عاوزين تجربوا حاجة مختلفة فعلًا ففرقة “آر تي نوبة” عاملين حفل غنائي في علبة ألوان بالزمالك. وسعر التذكرة: 60 جنيه. كمان الفنانة “هانيا فانسا” عاملة حفل غنائي، في مساحة باب 18 للفنون بمصر الجديدة. وسعر التذكرة: 50 جنيه. برضه في مساحة رووم في الزمالك، هيستضيفوا فريق الروك المصري “صدي ذات”. وسعر التذكرة: 50 جنيه.

وننتقل ليوم الجمعة، وحفلة في رووم مخصوص لليلة المايك المفتوح. وهي فرصة للجمهور لعرض مواهبهم المختلفة. وسعر التذكرة: 35 جنيه. أما في مركز دوار بوسط البلد، هيكون فيه العرض الأول لفرقة “استبينا”. واللي هتقدم أغاني تراثية من بلدان مختلفة. والدخول مجانًا. برضه أوركسترا أوزيريس الوتري،  عاملة حفل موسيقي على مسرح كاتدرائية جميع القديسين في الزمالك. وسعر التذكرة: 20 جنيه.

ونختم بيوم السبت، وحفل إنشاد ديني للشيخ إيهاب يونس على مسرح الحكمة بساقية الصاوي. وسعر التذكرة: 35 جنيه.

لو عاوزين تعرفوا أكثر عن الأحداث اللي بننشرها كل يوم في الشهر تابعوا أجندتنا.

ويك إند سعيد!