The Definitive Guide to Living in the Capital , Cairo , Egypt

بما أن الأجواء الجوية جميلة والإجازة الأسبوع ده طويلة إحنا جايين نشجعكم ونقولكم أخرجوا وأنبسطوا لمدة يوم واحد علشان الرحلة دي ممكن متتكرش تاني بسبب الكسل اللي بيتمكن منا لما الصيف بيدخل، ولكن الخروجة دي هتكون فسحة العمر، لأنكم هتمارسوا كل حاجة ترفع الأدرينالين وتخليكم مبسوطين في قلب العاصمة باقتراحات مميزة بيقدمها محررين كايرو 360، وتعالوا نتعرف على المتعة بجد في السطور اللي جاية.

مع نسيم الصباح نبدأ اليوم بالصحيان بدري علشان نفطر فطار مصري متميز سواء كان على عربية فول في أي منطقة وعلى سبيل الذكر سعد الحرامي بشارع شامبليون أو زوبا في الزمالك وأربياتا مصر الجديدة أو العمدة في الدقي أو الواحي في المعادي وغيرهم من الأماكن المتميزة في كل مكان.

كمان تقدروا تفطروا فطار مختلف زي الكرواسون والكابتشينو مع الكرواسون من Tbs أو Poul ودول فروعهم منتشرة في كل مكان، كمان تقدروا تجربوا ريشيوز أو مستر موسى في المعادي، وعندكم Bouchée في مصر الجديدة، وفيه كمان فورناليا الزمالك و palmé bakery بالتجمع الاول.

نخلص فطارنا ونشجع السياحة الداخلية ونطلع على المتحف المصري بالتحرير أو المتحف الكبير في الرماية ولكن خلوا بالكم لازم تحجزوا من موقعهم الأول قبل ما تروحوا، وكمان عنكم متحف الحضارات في الفسطاط واللي قريب منه كمان “مجمع الاديان” وبيضم مسجد عمرو بن العاص والمعبد اليهودي والكنيسة المعلقة، وممكن تزوروا المتحف الإسلامي في باب الخلق، والأقرب لقلوبنا أنكم تتمشوا في شارع المعز وتتفرجوا على جمال القاهرة الفاطمية بكل إبداعها وتصمايم البناء المميز.

أما لو وصلتوا لميعاد الغداء فترشيحنا هيكون بعيد عن أي تريند وجربوا فيش آند شيبس وسط البلد أو مطعم الإخلاص فتحي للمشويات في روض الفرج أو تجربوا أكلة مش وبطيخ من الجوهري في الحسين بجوار فرحات بتاع الحمام، أو مطعم النجاحي للنيفا في الغورية وكمان فيه طشة للأكل المصري بالمبتديان السيدة زينب، وغيرهم من الأماكن اللي بتتميز بيها ل منطقة.

بعد الغداء لازم تحبسوا بكوباية قهوة أو شاي، ويفضل طبعًا عصير، ومتنسوش لازم يكون معاكم مياه كتير طول اليوم ودي أهم حاجة تعملوها، ويفضل تاخدوا مشروبكم في أقرب قهوة بلدي في المنطقة اللي أنتوا فيها واستمتعوا بكل تفصيلة مش هتشوفوها غير من القهوة البلدي، وبعدها تقدروا تختاروا خروجة لحديقة عامة أو مكان بيقدم ألعاب وأنشطة مختلفة، زي حديقة الأزهر والحرية والأسماك والمعادي وغيرهم، والألعاب ممكن تكون في دريم بارك أو الملاهي وغيرهم وكمان تقدروا تتمشوا في مولات مميزة وتلعبوا فيها كمان زي مول العرب ومول مصر وسيتي ستارز وكايرو فيستيفال والحرية وسيتي ووك وغيرهم من المولات الكتير جدًا موجودة في القاهرة.

وبعد اللفة الجامدة دي ممكن تريحوا بقى وتروحوا سينما حسب العروض المتاحة وحبكم للأفلام والنجوم سواء عربي أو إنجليزي، ومتنسوش تشتروا فشار وتعيشوا حياتكم وتستمتعوا باليوم، ودي هتكون ختام اليوم اللي ممكن تقضوه مع الأسرة أو الأصدقاء وحتى لو وحدكم، المهم أنكم تستمتعوا بكل تفصيلة فيه، ومتنسوش أنتوا مش مرتبطين بترشيحاتنا لأن أكيد عندكم ترشيحات أكتر وأفضل بالنسبة للمود بتاعكم ودماغكم، المهم انكم تخرجوا وتنبسطوا ومتخلوش درجة الحرارة العالية نهارًا تنكد عليكم علشان الأجواء ليلًا بتكون ممتازة.