The Definitive Guide to Living in the Capital , Cairo , Egypt

دلوقتي سوق العربيات المستعملة في مصر بقى كبير جدًا وخاصة مع غلاء سعر الجديد وارتفاع أسعار المواصلات، وكتير من الناس بتقرر تشتري عربية مستعملة علشان تقضي بيها مشاوريها وخاصة لو أسرة، ولكن دايمًا الناس بتبص لسعر العربية بما يتناسب مع فلوسها، وظهرت في الفترة الأخيرة حالات نصب كتير تخص الملف ده، وعلشان كده لجأنا للمهندس أيمن سعيد المتخصص في فحص السيارات علشان يقولكم على 9 نصائح لما تشتروا عربية مستعملة تخلوا بالكم منها. تعالوا نعرف التفاصيل.

1- مهما كانت ميزانيتكم قليلة ماتشتروش عربية راشة دواخل زي “حوض الموتور – داير الباب – الشنطة.. إلخ”، لأن كده العربية بتكون عاملة حادثة وواخدة معجون واترشت علشان تداري اللحام والاستعدال.

2- لازم لما تشتروا عربية مستعملة تفتحوا الكبوت وتبصوا على فرد الشاسيه وتتأكدوا أنه مافيهوش لحام من أي نوع، وكمان تركزوا في الفواصل بين الفوانيس والاكصدام من قدام، والفوانيس اللي ورا في مكانها ومتوافقة مع الشنطة ولا فيها ترحيل.

3- ركزوا في العجل وبصوا على حالته وهل مرحل ولا في مكانه.

4- لما تشتروا عربية مستعملة أقفوا قدام العربية من النص وبصوا على السقف وركزوا علشان تعرفوا لو فيه إعوجاج أو ميل ولا لأ، ونفس الحكاية من ناحية الشنطة ورا، لأن ده هيوضح لو العربية عاملة حادثة واتظبطت ولا لأ.

5- شغل موتور العربية واسمع صوته، لأنه الصح بتاع أنه يكون هادي والـRpm عدد لفاته قليلة، وتبصوا على الموتور لو عليه زيت أو لأ لأن لو عليه زيت يبقى الموتور هيحتاج يغير طقم شنبر.

6- ضفيرة الكهرباء الخاصة بالعربية لازم تكون في أنابيب مطاطة ومتغلفة فراجعوا عليها، وشوفوا في الحوض لو فيه أي سلوك هربانة من مكانها ولا الدنيا تمام، ولازم تركزوا على علبة الفيوز والسلوك اللي جوا العربية تحت الدركسيون وهي موجودة فوق شمال الرجل الشمال، لو مترتبة وكويسة يبقى تمام ولو مش مترتبة يبقى فيه مشكلة.

7- العربية اللي راشة حزام نظافة مش أزمة، بس المهم يكون فعلًا كده مش عاملة حادثة واتصلحت، ماتثقوش في كلام صاحبها ولازم تكشفوا عليها من خلال فني أو مركز فحص.

8- لو فتيس العربية مانيوال يبقى تدوسوا دبرياج وتجربوا كل الغيارات بتاعة العربية، ولازم الفتيس يكون بينزل بسهولة وسلاسة، وماينفعش لو بتدوا غيار يرد لوحده، كده فيه مشكلة، ولو أوتوماتيك يبقى لازم التجربة وتسوقوا العربية وتركزوا في الفتيس وأنه مش بيطول في النقلة ونقلاته سريعة وصوته مش خشن وجربوا النقلات كلها بين بعضها “D – R – M – P”.

9- افحصوا التكييف وأنتم بتشتروا عربية مستعملة ولو صاحبها قالكم التكييف بتاعها مش شغال وعاوز يتشحن بس، يبقى تشحنهوه الأول وتضمنوا أنه سليم، لأنه ممكن يطلع محتاج كباس أو سربنتينة عاوزين يتغيروا وممكن أكتر من كده وهتتكلفوا كتير.

تقدروا تعرفوا أكتر عن فحص السيارات والاستفسار من صفحة المهندس أيمن سعيد للسيارات على فيسبوك من هنا.