The Definitive Guide to Living in the Capital , Cairo , Egypt

العيد عند المصريين دايمًا مرتبط بالخروجات، وكل جيل بيحب يقضي العيد بطريقته، بس اللي ما بيتغيرش هو فرحة الخروجة مع الأصحاب والعيلة! وعلشان تستمتعوا بالعيد على أصوله، قررنا نجمع لكم أسعار تذاكر أحلى حدائق القاهرة، علشان تختاروا المكان اللي يناسب ميزانيتكم بسهولة!

حدائق القاهرة وأسعار التذاكر في العيد 2025

1- حديقة الأندلس

لو بتحبوا التصميمات الأندلسية والجمال الكلاسيكي، حديقة الأندلس هتكون اختيار مثالي! الحديقة موجودة بجانب أوبرا القاهرة، وسعر التذكرة 5 جنيه بس.

2- حديقة الحرية

قصاد حديقة الأندلس هتلاقوا حديقة الحرية، المكان المثالي للاسترخاء وسط الطبيعة الخضراء، وسعر الدخول 20 جنيه.

3- حديقة الأسماك

حديقة مميزة جدًا بتصميمها اللي بيشبه تجاويف الشعب المرجانية، وبتضم أنواع مختلفة من الأسماك، وسعر التذكرة 5 جنيه للفرد.

4- حديقة قصر عابدين

واحدة من الحدائق الجديدة اللي بقت وجهة مفضلة للشباب والعائلات بسبب موقعها المميز قدام قصر عابدين، وسعر التذكرة 5 جنيه.

5- حديقة الأزهر

من أكبر وأجمل حدائق القاهرة، والفيو منها على القاهرة التاريخية بيخليك تعيش تجربة مختلفة، وكمان فيها مطاعم وكافيهات ونافورة جميلة، وسعر التذكرة 40 جنيه.

6- حديقة العبور

لو بتحبوا التمشية على النيل وسط المساحات الخضراء، فحديقة العبور في الزمالك هتكون اختيار رائع، وسعر الدخول 20 جنيه.

7- الحديقة اليابانية

في قلب حلوان هتلاقوا الحديقة اليابانية بتصميمها الفريد والمختلف، مكان مناسب جدًا للخروجات العائلية، وسعر التذكرة 10 جنيه.

8- حديقة أم كلثوم

في المنيل وعلى ضفاف النيل هتلاقوا حديقة أم كلثوم، مكان هادي وجميل للخروجات العائلية، وسعر التذكرة 10 جنيه.

9- حديقة الفنون

ما بين الجمال الطبيعي والفن، حديقة الفنون في المنيل بتجمع بين المساحات الخضراء وإطلالة مميزة على النيل، وسعر التذكرة 10 جنيه.

10- حديقة الطفل

لو معاكم أطفال، فحديقة الطفل هتكون الاختيار المثالي، لأنها بتضم ألعاب وأنشطة مناسبة لكل الأعمار، وسعر التذكرة 20 جنيه.

وأخيرًا..

دلوقتي القرار عندكم! اختاروا المكان اللي يناسبكم واستمتعوا بخروجة عيد مميزة مع الأصحاب والعيلة! عيد سعيد يا أهل القاهرة!