تفاصيل عقد القران في 5 مساجد أثرية بالقاهرة.. فرحك بطعم التاريخ
أسعار كتب الكتاب في المساجد أماكن كتب كتاب كتب الكتاب في السلطان حسن مساجد أثرية لعقد القران
Mohamed Talaat
مصدر الصورة الرئيسية هنا.
عقد القران أو زي ما بيقولوا عليه في مصر “كتب الكتاب”، مناسبة مهمة جدًا في مصر، ومؤخرًا أصبح كثير من العرسان بيتجهوا للمساجد الأثرية علشان يعملوا كتب الكتاب فيها لأنهم بيحبوا يعيشوا تجربة مميزة يبدأوا بها حياتهم، ومافيش في العالم مباني عظيمة من التاريخ الإسلامي زي الموجودة في مصر، وخاصة القاهرة اللي بتحتضن مجموعة من المساجد الأثرية المميزة والمصنفة عالميًا كتراث أثري فريد، وده اللي هيخلينا نسلط الضوء على أهم 5 مساجد وأسعار عقد القران فيها خلال السطور الجاية طبقًا لما أعلنه المجلس الأعلى للآثار.
بداية وضح المجلس الأعلى للآثار أن مدة عقد القران داخل المسجد بتكون 3 ساعات والحجز متاح لكل الأفراد دون تمييز، وممنوع إقامة عقد القران في مواعيد العمل الرسمية “وقت الصلاة”، ولو هتستخدموا المياه والكهرباء بيتم إضافة 1000 جنيه زيادة عن السعر المعلن ده غير أنه ممنوع أي مظاهر احتفالية صاخبة زي الصوتيات والألعاب النارية وغيرها، وبيكون فيه تأمين يتراوح ما بين 10 حتى 20% بيتم استرجاعها بعد عقد القران لو مافيش تلفيات.
وأغلى مسجد حاليًا في عقد القران وسعره 20 ألف جنيه هو صحن مسجد محمد علي بالقلعة، وبيكون لعدد 200 فرد كحد أقصى.
وبسعر 10 آلاف جنيه وبحد أقصى 200 فرد وكل 100 فرد زيادة بيكونوا بـ3000 جنيه تقدروا تحجزوا مساجد:
الحاكم بأمر الله بشارع المعز.
مسجد أحمد بن طولون السيدة زينب.
مسجد الرفاعي بالخليفة.
مسجد السلطان حسن بالخليفة.
