The Definitive Guide to Living in the Capital , Cairo , Egypt

قعدة البيت بالنسبة لناس كتير كابوس، خاصة الناس اللي اتعودت تنزل من بيتها كل يوم الصبح لأي سبب سواء دراسة أو شغل، مابيتحملوش يلاقوا نفسهم فجأة بلا نظام، الكلام ده بيكون مؤقت في كل الأحوال، لو المذكور هنا راجل، لكن بالنسبة للبنات والستات الموضوع بيكون مختلف تمامًا، ستات كتير بتقرر تقعد في البيت بعد الجواز أو الخلفة أو التخرج لأسباب مافيش أكتر منها، وستات كتير بتطلع معاش بعد سن الستين وناس بيقعدوا غصب عنهم بسبب إصابة أو مرض ما وهنا بيبدأ الكابوس، والشعور إن الحياة انتهت،  الموضوع ده ليه بروفة بنشوفها كلنا في أجازات العيد والناس اللي بتفضل تتريق علي شعورها السخيف بالفراغ بكلام من عينة، أنا في جزيرة القطن، أنا هتفسح في الصالة وهصيف في البلكونة، وغيره من السخرية والكوميكس اللي بتنتشر مع أجازة طويلة، هي هي الناس اللي بتستنى الأجازات بفارغ الصبر، بتزهق وتتخنق وتحس بعدم جدوى القعاد في البيت، في الموضوع ده بنحاول نوصل لصيغة تفاهم مع نفسنا إذا كنا مضطرين نقعد في البيت لأي سبب وكلها نصايح قايمة على مبدأ واحد مهم جدًا، قعدة البيت مش هدف في ذاتها ولا الشغل هدف في ذاته، السعادة والاستمتاع وتحقيق الذات هم الهدف في كل الحالات.

 مافيش وقت
دي كلمة السر اللي لازم تتعاملي علي أساسها طول الوقت، قعدة البيت مش مرادف للأنتخة ولا توافر الوقت، قعدة البيت معناها تغيير في جدول المهام مش أكتر، معناها مافيش وقت علشان نصحى متأخر مافيش وقت علشان نسهر كتير مافيش وقت علشان نقضي في حاجة واحدة أكتر من ساعة متواصلة إلا إذا كانت حاجة متعلقة بشغل أو نوم أوخروج.

الانبساط
قعدة البيت مش انبساط زي ما ناس كتير متخيلة، اللي قاعدة في البيت مش لابسة بيجامة حرير وصاحية النور بيداعب عينيها وصينية الفطار مستنياها، اللي قاعدة في البيت غالبًا شخصية محبطة جدًا وزهقانة وحاسة أنه الأيام شبه بعضها،  الفرق الوحيد بيكون يوم الجمعة لما تشوف الناس رايحة صلاة الجمعة.

عمل جدول في الأيام العادية سهل، لكن عمل الجدول جوه البيت صعب، وعلشان تقدري تفكري وتنظمي وقتك وتلاقي نقطة بداية لازم تتبسطي وتستفيدي بوقتك الفاضي على أكمل وجه، لو مش بتتقني التعامل مع الوقت الفاضي عمرك ما هتعرفي تسدي في المليان لأننا كلنا زي العربية ووقودنا الاستمتاع لو مكتئبة عمرك ما هتعرفي تسدي أو يكون عندك أي إبداع.

مافيش روشتة واضحة للاستمتاع والانبساط، وعلى فكرة مش معاناه أنك تصرفي فلوس كتير على لبس وخروج وقعاد في كافيه غالي، الانبساط الحقيقي في اللحظات اللي بتلاقي فيها نفسك، بتتكلمي فيها مع صاحبة فهماكي كويس تناقشيها في كل شكل حياتك، في كوباية عصير قصب بتشربيها وأنتِ منهمكة في التفكير في مستقبلك واللي عاوزة تعمليه، أغنيتك المفضلة، أنشطتك المقربة لقلبك، الكتابة لو بتحبيها وغيرها من الأنشطة الصغيرة اللي بتفرح وبتساعد الإنسان يلاقي نفسه ويعرف هو عاوز إيه بالضبط.. جاي منين ورايح فين.

الترتيب والجدول
القعدة في البيت مش معناها السبهللة، الست أو البنت اللي قاعدة في البيت عندها مليون حاجة مطلوبة منها لكن إحساس أنها قاعدة في البيت بيديها شعور بالأريحية وأنه لسه الوقت طويل هنا بيبدأ تضييغ الوقت اللي دايمًا بينتهي بتأنيب ضمير وشعور بالذنب والضياع،  لازم يكون في جدول حتي لأبسط المهام حتي لو كان تلميع الترابيزات كمان بالخروجات والمهام المطلوبة بره البيت والخاصة بكل فرد في الأسرة.

الاهتمام بالنفس والآخرين
الميزة الوحيدة للقعاد في البيت هي عدم التقيد ببصمة غبية في مؤسسة كلها موظفين، أنتِ مش مضطرة تحضري في مكان معين كل يوم شتا وصيف وخريف وربيع، أنتِ مديرة نفسك ونفسك تقدر تعمل أحسن ما عندها لو اهتميتي بيها كويس، القعاد في البيت فرصتك الذهبية علشان تاخدي بالك من روحك، تركزي في شعرك اللي اتقصف، عيونك الدبلانة وجسمك اللي اترهل من كتر الأكل السريع اللي مش محسوب، القعدة في البيت فرصتك علشان تلاقي نفسك وترتاحي استراحة محارب وتقدري تعرفي أنتِ فعلًا حابة تكملي قعاد في البيت ولا عاوزة تشتغلي بشكل معين سواء عمل نظامي أو حر أنتِ تكوني فيه تبع نفسك بالشروط والمحددات اللي تحطيها وتكوني مسئولة عنها.

كسب المال
قعادك في البيت معناه أنك شغالة عند نفسك، مهما كان تعليمك لازم يكون ليكي حاجة بتعمليها، الشغل فعلًا مش عيب مهما كان بسيط، حتى لو هتخصصي جزء من وقتك تكوني جليسة أطفال، أو تراعي حد مسن، أو تعملي شغل فري لانس تبع مجال تخصصك، مهما كنتِ متيسرة ومش محتاجة الفلوس لازم يكون في حاجة في حياتك تدر عليكي دخل، مهما كان بسيط بس ده هيخليكي تقربي أكتر من شغفك، عندك مليون طريقة تساعدي بيها نفسك، سواء من خلال الإنترنت مواقع كتير بتساعدك تشتغلي وتعرضي خدماتك أو بتديكي عروض شغل وأنتِ وظروفك، طبعًا ملك الشغل “فيس بوك” مش بس عرض وطلب لكن كمان بيديكي إمكانية تفتحي صفحتك الشخصية مهما كان تخصصك هيخليكي تخلقي لنفسك فرصة شغل، أهم حاجة تحاولي وتعرفي إن الوجود معناه تقديم خدمة للنفس وللآخرين، مهما كانت بسيطة لكن لازم تكون موجودة.