The Definitive Guide to Living in the Capital , Cairo , Egypt

في حالة من الترقب العالمي لافتتاح المتحف المصري الكبير اللي غالبًا هيكون في الربع الأخير من سنة 2020، واللي يعتبر الحدث الأبرز في عالم الآثار والمشروع الحضاري والثقافي الأكبر في القرن الواحد والعشرين، واللي من المؤكد إنه هيكون موقعه استراتيجي وسهل الوصول له ولا يقل أهمية عن مكانته العالمية.

بشكل مبدئي المتحف المصري الكبير مش هيكون مجرد متحف بس، إنما هيكون ملحق بيه مركز للدراسات العلمية والتاريخية والأثرية على مستوى عالمي.

مساحة المتحف حوالي 491 ألف متر مربع ، المبنى الرئيسي للمتحف هيغطي 168 ألف متر مربع، وهيكون فيه 100 ألف قطعة أثرية هيشوفها العالم للمرة الأولى، وطبعًا مع مساحة زي دي، أكيد هيستوعب المتحف عدد زوار ضخم، ممكن يوصل لـ 150 ألف زائر في اليوم الواحد.

بالنسبة لموقع المتحف المصري الكبير فهو متميز جدًا، وده لإنه على الهضبة الصحراوية بين الأهرامات والقاهرة الجديدة (على طريق مصر – الإسكندرية الصحراوي) وده بيدي فرصة جميلة  للزوار إنهم يشوفوا الأهرامات الثلاثة من خلال الحائط الزجاجي الموجود في المتحف المصري الكبير، ده غير قربه من مطار أبو الهول الدولي الجديد؛ اللي هيتيح وصول أعداد كبيرة من السائحين بشكل مباشر لمنطقة المتحف والأهرامات.

أما المنطقة المحيطة بالمتحف فهي منطقة إعادة تخطيط بالكامل، وهتبقى ضمن منطقة سياحية مساحتها ضخمة جدًا، تصل لحوالي 9400 فدان، حدودها من الشمال والجنوب الطريق الدائري الإقليمي، وحدها من الشرق ترعة المنصورية، ومن الغرب طريق الفيوم مع طريق الواحات.

ومن أهم القرارات اللي هتغير معالم المنطقة المحيطة بالمتحف هو قرار إنشاء “نفق الفيوم” واللي صدر قرار بإنشاؤه بعد دراسة لطرق الوصول للمتحف وخطط تأمين السائحين في الدخول والخروج، وهيكون طوله حوالي 1200 متر ومكون من 6 حارات مرورية لكل اتجاه، وكمان نفق للخدمات (كهرباء – مياه – غاز) هيخدم المنطقة كلها، وهيربط بين المتحف المصري الكبير ومنطقة نادي الرماية وهضبة الأهرامات ومن المقترح إن يتم الانتهاء من تنفيذه 30 يونيو 2020 وبالتالي ده هيساعد في إنشاء أول فندق سياحي ترفيهي تجارى موجود على هضبة الأهرامات.

ده بالإضافة لتنفيذ طريق شمالي فاصل بين أرض المخابرات العامة وهى على مساحة 52 فدانا، والطريق الجنوبي الفاصل بين نادي الرماية على مساحة 117 فدانا، مكون من أربع حارات لكل اتجاه، ده غير تطوير وتجديد طريق الإسكندرية علشان يبقى أربع حارات في كل اتجاه، حارتين للتهدئة وإزالة التكدس الجاي لطريق دخول المتحف، ده غير حارات للطريق الدائري وحارتين للطريق الشمالي، علشان يبقى عندنا في منطقة نزلة الدائري 14 حارة.