The Definitive Guide to Living in the Capital , Cairo , Egypt

شركة أوبر المتخصصة في خدمات النقل، أطلقت خدمة جديدة لسكان القاهرة، من خلال تطبيق “ Uber Eats“، وده أول تطبيق للشركة بيخليك تطلب أكل من 100 مطعم بشكل مبدئي، في مناطق “الدقي – وسط البلد – العجوزة – الزمالك – المهندسين”، وإحنا في كايرو 360 قررنا نخوض التجربة كاملة، ونستخدم الخدمة، علشان نجيب لكم كل تفاصيلها.

يعني إيه أوبر إيتس؟

خدمة أوبر إيتس، خدمة لطلب وجبات الطعام، في القاهرة، بدأت رسميًا من يوم الأحد، والتطبيق الجديد بيوفر وجبات من ١٠٠ فرع من مطاعم القاهرة، بداية من المطاعم المحلية ووصولاً إلى أشهر العلامات التجارية العالمية في عالم الأكل. ومدة التوصيل عبر أوبر إيتس ما بتزيدش عن 40 دقيقة. يعني باختصار شديد بتطلب الأكل بنفس الطريقة اللي كنت بتطلب بيها عربية من أوبر، سواء كنت في البيت أو الشغل أو حتى قاعد على القهوة. يعني من أي مكان.

جربنا نطلب الخدمة خارج محيط المناطق اللي قلنا عليها فوق ولكن كانت بتظهر لنا رسالة “الخدمة غير متاحة في تلك المنطقة، ويمكننا إبلاغك في حالة توافرها”، وقررنا نطلب الخدمة في وسط البلد.

كل اللي أنت محتاجه، هو أنك تحمل تطبيق “Uber Eats” بعدها بتعمل حساب خاص بيك، أو ممكن تدخل من خلال حسابك على تطبيق أوبر لخدمة النقل، وبتحدد المنطقة اللي أنت فيها، وتبدأ تشوف المطاعم القريبة منك حسب احتياجاتك، وتختار المنتجات اللي عاوزها، وممكن تختار أكتر من مطعم ومنتج، وكمان تقدر تستخدم خدمة الدفع النقدي عند الاستلام، ودي حاجة كويسة، أو ممكن تستخدم خدمة الدفع عن طريق الكريديت كارد.

جربنا الخدمة وطلبنا أوردر من الزمالك، ووصل في مايقرب من 45 دقيقة، وكان الحساب على التطبيق 61 جنيه، ولكن الفاتورة من المحل كانت 135 جنيه، وبقينا محتارين هندفع أنهي فاتورة فيهم، ولكن الدليفري قال لنا أنه بيعتمد على التطبيق وملوش دعوة بالفاتورة بكام، ولكن للأسف المنتج وصل مقلوب وأكيد دي حادثة عابرة ونتمنى أنهم ياخدوا بالهم منها.

الحقيقة الخدمة بمجملها كانت كويسة وسريعة وتابعنا الدليفري لحد ما وصل عن طريق الأبليكيشن ولما وصل اتصل بينا قبل ما يطلع لنا، كمان هما عندهم سكوتر خاص بيهم بصندوق لونه موف مكتوب عليه Uber Eats، يعني توقعوا تشوفوا الصندوق ده كتير قريبًا في شوارع القاهرة.

لاحظنا كمان أن التطبيق مافيهوش خدمة الدفع النقدي لهواتف آيفون اللي بتشتغل بنظام IOs ، لكن الخدمة متاحة فقط في أي هواتف بتشتغل بنظام أندرويد.

وتقدر تحمل التطبيق لأجهزة أندرويد من هنا.

ولأجهزة آبل تقدر تحمل التطبيق من هنا.