حمام وأم علي وشاي خمسينة.. رحلة لأقدم مطاعم ومقاهي حي الجمالية
المالكي قهوة الفيشاوي مطعم الدهان القديم مطعم فرحات نجيب محفوظ
Mohamed Talaat
كل مكان في القاهرة مليان بالحكايات والحواديت، وأجمل توثيق للحكايات دي شوفناه في روايات العظيم نجيب محفوظ، واللي اتكلم عن الحارات والشوارع والناس في مناطق القاهرة العتيقة، خاصة في حي الجمالية. ولعشقنا الكبير للحي ده، هنأخذكم في رحلة للتعرف على 5 أماكن للأكل والشرب في الجمالية بطعم تاريخ القاهرة العريق.. اتفضلوا معانا.
كبابجي الأزهر
هو فرحات الأصلي ملك الحمام والبهاريز وتم افتتاحه من أكتر 40 سنة على إيد الحاج مجدي عبد الوهاب، في ممر متفرع من حارة صغيرة جنب مسجد الحسين، وكمان بيقدم ريش وكفتة مميزين.
العنوان: 126 شارع الأزهر – الجمالية.
رقم التليفون: 16102
تقدروا تعرفوا أكتر عنهم من خلال صفحة الفيسبوك من هنا.
الدهان
في سنة 1890 كان بداية مطاعم الدهان في مصر، وحقق نجاح مهول من خلال فرعه الأول بجوار مسجد الحسين واللي أول ما تدخلوه هتلاقوا لوحة كبيرة اللي بتقول “تم منح الحاج علي الدهان الميدالية الفضية من الجمعية الزراعية الملكية في 1936″، وهو في الأصل كان مطعم نيفة ولكن حاليًا هو من أفضل محلات الكباب في مصر كلها وله فروع مختلفة.
العنوان: 16 شارع جوهر القائد – الجمالية.
رقم التليفون: 0225939325
تقدروا تعرفوا أكتر عنهم من خلال صفحة الفيسبوك من هنا.
المالكي
منتجات الألبان لعبتهم وبيقدموا أفضل جودة ممكن تتخيلوها، وهتلاقوا عندهم أحلى أم علي وأرز باللبن، واتأسس سنة 1917 بجوار المشهد الحسيني.
العنوان: 28 ميدان المشهد الحسيني – الجمالية.
رقم التليفون: 19017
وتقدروا تعرفوا أكتر عنهم من خلال صفحة الفيسبوك من هنا.
نجيب محفوظ
كمان بيطلق عليه مطعم خان الخليلي وهو قمة في الفخامة وبيدار عن طريق مجموعة فنادق عالمية، وبيقدموا مستوى مختلف في الأكل والشرب والأجواء عندهم، وهتحسوا أنكم سافرتم لزمن تاني بمجرد دخولكم من بوابة المكان، وبيرجع تاريخ تأسيسه لسنة 1989 ودي سنة حصول نجيب محفوظ على جائزة نوبل وعلشان كده اتسمى باسمه تكريمًا له.
العنوان: 5 شارع سكة البادستان – الجمالية.
رقم التليفون: 0225903788
تقدروا ترعفوا أكتر عنهم من خلال صفحة الفيسبوك من هنا.
الفيشاوي
الفتوة فهمي الفيشاوي أسس القهوة سنة 1797 في قلب منطقة خان الخليلي، واتشهرت بخدماتها ورونقها وديكوراتها وكان بيقعد فيها صفوة المجتمع المصري وبيزورها كتير من العرب والأجانب مخصوص وهي مشهورة بكراسيها الخشب والكنب المزخرف والمطعم بالحلي وكمان المرايات الخشب، وفيها مجموعة من التحف النادرة واللي مش هتلاقوها في مكان بره ومنها اللي كان ملك الملك فاروق.
العنوان: 5 سكة خان الخليلي – الجمالية
للأسف هما ملهمش رقم تليفون ومش متواجدين على السوشيال ميديا.
