The Definitive Guide to Living in the Capital , Cairo , Egypt

طول الوقت بنسمع عن الحمامات الشعبية، اللي الناس بتروحها علشان تخوض تجربة الراحة والاستجمام. ويتخلصوا من التعب و الإرهاق. وكمان بيروحوه العرسان الجداد. فقولنا إحنا كمان نروح، ونحكي لكم عن تجربتنا في “حمام التلات الشعبي”.

خدنا بعضنا بربطة المعلم وانطلقنا على بولاق أبو العلا. وبعد ما مشينا في شوية طرق وحواري وسألنا الناس، وصلنا لمكان الحمام. 

المكان هناك عبارة عن حمامات مختلفة. يعني هتلاقوا حمام “عوكل”، أو حمام “علي مشمش”، وغيرهم. وكلهم بيقدموا نفس الخدمات. وكمان في حمامات خاصة بالسيدات طبعًا. قبل ما نروح زميل لنا قالنا اسألوا على حمام “عوكل”، علشان هو كان مجربة قبل كده. وده كان الحمام اللي روحناه.

أول ما بتدخل بيستقبلك واحد من العاملين في الحمام، ويديك الأقفال بتاعت الأدراج اللي هاتحط فيها هدومك وحاجتك بعد ما تغير. وطبعًا بتكون مجهز معاك الشورت بتاعك وشبشبك وفوطتك.

بعد كده بتدخل الحمام، وعرفنا من العامل إن أفضل طريقة للاستفادة من الحمام هي إنك تبدأ بدش مياه ساقعة لمدة دقيقتين أو ثلاثة. تخلص وتروح على أوضة البخار وتفضل فيها لمدة 5 دقائق. تطلع من أوضة البخار تروح لحاجة زي مغطس صغير فيه مياه ساقعة، لمدة 5 دقائق برضه. ومنه تطلع على مغطس تاني في مياه ساخنة جدًا، لنفس المدة. وتكرر العملية دي من 3 لـ 4 مرات.

ولما سألنا عن التبديل المفاجيء من سخن لبارد والعكس، عرفنا إنه بالطريقة دي بتتقشر كل الأوساخ عن الجسم، وتتشال بسهولة.

بعد كده بييجي واحد من العاملين ويليف جسمك كله بليفة مغربية. الليفة دي بتلاقيها عند أي عطار. أو ممكن تاخدها من المكان هناك لو ماجبتش. أول ما تخلص بتروح تاخد دش ساقع، وتنزل بعدها في المغطس الساقع لمدة 5 دقائق.

بتطلع من المغطس، هييجي واحد تاني من العمال، هيمسحلك جسمك كله بالصابون. ويعملك مساج لرجلك وفي منطة الصدر والضهر. وتكرر نفس موضوع الدش والمغطس الساقع تاني. وكده تبقى خلصت وتقدر تروح.

التجربة فعلًا هتحسسك بفرق في راحة جسمك. ده غير بقى الانبساط والفرفشة لما تنزل المياه مع أصحابك وكأنك في البيسين. والموضوع ده كله هيكلفك في حدود 70 جنيه، وأنت ممكن تسيب إكرامية للعامل زي ما تحب طبعًا. إحنا خرجنا من الحمام مبسوطين، ومقررين إننا نخوض التجربة تاني وتالت كمان. روحوا وجربوا.. هتنبسطوا.