حكاية بنت مصرية هتغطس لمدة 55 ساعة متواصلة.. تفتكروا هتقدر؟
بنات مصر تحدي 55 ساعة غطس تنشيط السياحة ريم أشرف سباحة شرم الشيخ غطس قصص نجاح موسوعة جينيس
Nagla Ashraf
الحياة تحت المياه مع الكائنات البحرية ليه سحرها اللي بيتحول لإدمان بعد فترة ويبقى صعب أنك تبعد عنه، بالذات لما تبقى غطاس محترف سحر البحر وجماله بيخلوا الغطاس عاوز باستمرار يتحدى قدراته ويعمل أرقام قياسية.
وريم أشرف فوزي اللي عندها 14 سنة بس حاولت تعمل ده بعد التواصل مع موسوعة جينيس والتحدي اللي هتقوم بيه ريم هيكون بهدف تنشيط ودعم السياحة وهتغطس لمدة 55 ساعة متواصلة.
وكان أعلى رقم للغطس هو 51 ساعة وقامت بيه سباحة أسترالية.
طبعًا عدد الساعات كبير بس ريم نقلت حياتها لشرم الشيخ مخصوص علشان تتدرب أكتر، وتتابع مع فريق أطباء ومدربين محترفين، وبتستعد في كل لحظة ليوم 3 أكتوبر اللي هيتنفذ فيه التحدي بتاعها. وبتقول لـ كايرو 360 إنه لولا دعم والدها ووالدتها والمدربين ماكنتش هتقدر تعمل ده طبعًا.
بس تعالوا نعرف الحكاية بدأت من إمتى؟!
البداية لما كان عمر ريم 5 سنين وكانت بتشوف والدها بيتدرب في الصاعقة واعتبرته قدوة ليها، ومن وقتها وهي حبت الغطس، فقررت بعد سنين من التدريب أنها تتدرب وتعمل رقم قياسي في الغطس يجذب أنظار العالم لمصر. وبعتت لموسوعة جينيس واللي ماكنش فيها الفئة العمرية بتاعة ريم لكن بعد التواصل على الإيميل وافقوا على اقتراحها أنهم يدخلوها من فئة الكبار وقبلوا أنها تتحدى حد أكبر منها بكتير.
