The Definitive Guide to Living in the Capital , Cairo , Egypt

الفترة دي، ناس كتير لاحظت رفض أغلب البياعين في القاهرة للتعامل بالعملات الورقية من فئة الجنيه والنصف جنيه.. فهل فعلًا صدر قرار حكومي بوقف تداول الفئات دي من العملات الورقية؟ وتعمل إيه لو معاك عدد كبير من الجنيهات الورق ومش عارف تصرفهم؟ تعالوا نعرف.

مؤخرًا، أكد البنك المركزي المصري استمرار سريان التعامل بجميع العملات الورقية بلا استثناء، ونفى كل الأخبار اللي انتشرت عن إلغاء التعامل بفئة الجنيه أو النصف جنيه الورقي.

وبحسب البنك، بيتمتع الجنيه الورقي بقوة إبراء كاملة، وممنوع منعًا باتًا على كل البائعين رفض استلامه من المواطنين مقابل السلع والخدمات، ومن حق المواطنين استخدامه بشكل طبيعي في جميع المعاملات المالية.

طيب تعمل إيه لو معاك عملات ورقية من فئة الجنيه؟ الحكومة المصرية أكدت بشكل رسمي إن أي شخص يرفض التعامل بالجنيه الورق بيُعرِّض نفسه لطائلة القانون، باعتبار التصرف ده انتقاص من قيمة العملة الوطنية، ومن حقك تبلغ الشرطة عن أي شخص بيرفض التعامل بالنوع ده من العملات.

كمان مهم تعرف إن كل وسائل المواصلات المصرية الحكومية، بتتعامل بشكل عادي بالعملات الورقية، يعني تقدر تشتري تذاكر أتوبيس أو مترو بأي عملات ورقية معاك، وتقدر كمان تدفع كل فواتيرك بالجنيه الورق.

كمان لو حابب، تقدر تتوجه لأي بنك وتغير أي عملات ورقية معاك بأي فائت تانية أنت محتاجها.

وبصفة عامة، مهم تكون عارف إن سحب عملة من التداول بيصدر بيه قرار قبله بـ3 شهور على الأقل، مع طرح كل الأسباب ورا القرار ده بشكل شفاف، ومادام ماصدرش أي قرار بشأن الجنيه الورقي فهو بيتمتع بقوة إبراء بالقانون، ووجب التعامل به من جميع الأطراف المتعاملة علشان مايتمش تعريضهم لطائلة القانون، ومن ثَمَّ العقوبات المقررة.