The Definitive Guide to Living in the Capital , Cairo , Egypt

منطقة الزمالك من المناطق اللي لها تاريخ عظيم وفيها أماكن مميزة، وهي جزيرة بيحاوطها النيل من كل الاتجاهات، وتعتبر من أرقى المناطق في القاهرة. والخروجات في الزمالك دايمًا مختلفة ومميزة، وهتلاقوا فيها كل اللي يرضيكم سواء خروجات ثقافية، ترفيهية، عائلية، وغيرها اللي تناسب كل الأشخاص، وعلشان كده خلال السطور الجاية هنقول لكم إزاي تقدروا تقضوا يوم كامل في الزمالك علشان تستمتعوا بخروجة ماتتنسيش أبدًا.

وفي البداية محبي الخضرة والمساحات الواسعة هيقدروا يزوروا حديقة الحرية واللي مناسبة لكل الأعمار، وهي تعتبر أكبر حديقة بتحتوي على تماثيل وكل تمثال له حكاية، ومافيش أجمل من أنكم تاخدوا فطاركم وتبدأوا يومكم بحب ومرح ولعب كمان في الحديقة.

بعد الفطار واللعب هتتمشوا لحد برج القاهرة واللي هتقدروا تشوفوا منه مصر بشكل تاني خالص، وهتتصوروا أجمل صور ممكن تتخيلوها، ده غير أنكم ممكن تتغدوا في المطعم الدوار اللي هتعشقوا الفيو بتاعه وأنتم شايفين القاهرة كلها حواليكم.

زيارة البرج هتخلص ويادوب هتلحقوا زيارة قصر عائشة فهمي، واللي اتبنى في العصر المملوكي، وله تصميم معماري مميز وأنيق، وفيه لوحات فن تشكيلي وتماثيل بتزين الغرف بتاعته، ده غير أنه مليان زخارف على الطراز الأوروبي القديم، وبيتعمل فيه معارض كتير طول الوقت، وهو موجود على نهر النيل وتقدروا تستمتعوا بفيو النيل في هدوء وروقان.

ولو أنتم من عشاق المسرح والغناء والثقافة لازم تروحوا ساقية الصاوي، أشهر ملتقى ثقافي في القاهرة كلها، وتقدروا تحضروا حفلات أو ندوات مختلفة حسب اليوم اللي هتروحوا فيه، ولازم الحجز سواء عن طريق الأونلاين أو شباك التذاكر.

بعد ما خلصنا كل حاجة تقدروا تتمشوا في شوارع الزمالك الجميلة وتختاروا مطعم أو كافيه تتعشوا أو تشربوا حاجة فيه قبل ما تروحوا وتعيشوا أجواء الزمالك الليلية، وماتنسوش قبل ما تختاروا أي مكان تشوفوا التقييمات بتاعته على موقع كايرو 360 علشان تستمتعوا بتجربة مميزة ومختلفة.

الجولة في منطقة الزمالك مش بتخلص وفيه حاجات كتير ممكن تعملوها مختلفة، لكن إحنا اخترنا يكون البرنامج خفيف ومناسب للكل، وأنتم تقدروا تعدلوا فيه زي ما تحبوا، المهم تنبسطوا وتستمتعوا بمنطقة الزمالك الجميلة.