The Definitive Guide to Living in the Capital , Cairo , Egypt

يمنى أحمد

يمكن القاهرة فيها حاجات مدهشة كتير، لكن إنك تجمع بين المدينة والريف فيها شيء مدهش أكتر، خاصةً لما الصفتين دول يجتمعوا مع النيل، هتحس إنك مسحور وأنت في وسط المياه، لأ وكمان الزمن وقف بيك مع الناس الجميلة اللي في المكان ده. النهاردة كايرو 360 هياخدك في جولة داخل جزيرة الدهب بالقاهرة، المكان الجنة فعلًا بمعايير أهل المدينة والبسيط على طريقة أهل الريف!

خلينا نقول لك إن المكان عبارة عن أرض ترابية، كلها زرع وشجر موجودة وسط نيل القاهرة على بعد خمس دقايق من مترو الزهراء، على مساحة تقدر بأكتر من 300 فدان، طبعًا بندخل لها بالمعدية واللي تبدو وسيلة مواصلات لذيذة ومختلفة عن الأتوبيسات اللي بنركبها كل يوم، المرة دي الرحلة هتاخدك لجوا حياة الناس البسيطة اللي قررت تعيش حياتها راضية ومعطاءة بشكل ملفت فعلًا.

لحد كده يمكن يبان لك عادي، جزيرة في وسط النيل والناس بتروح تزورها إيه المدهش يعني؟ المدهش هو الناس اللي فيها، الحيوانات والطيور عايشة مع البشر بتسامح فعلًا، الهرولة اللي بتحصل لما أي حد غريب يدخل الجزيرة دي، الزوار بيتخطفوا بين البيوت علشان الناس تضايفهم بالموجود، بس الموجود ده متقدم بطيب خاطر فيصح نوصفه بأنه أجمل أكل ممكن تدوقه في حياتك!

ممكن تحس إنك دخلت جزء من المدينة الفاضلة اللي في خيالك، فيه جدرايات كتير بتعبر عن طيبة أهلها، ورسومات بتقولك إنه فيه وحدة وطنية وتعايش سلمي، وتجمعات فيها ناس متكاتفة تعرفك جدعنة المصريين الحقيقية، أه ممكن تشوف ده في أماكن كتير، ولكن إن كلهم يجتمعوا في مكان واحد وطبيعته مختلفة ده هيخليك سعيد ومش عايز حاجة تاني من الدنيا.

هتكون نظرة مختلفة لما تشوف حد من المدينة نازل أرض زراعية بيحرث فيه، ده بس علشان حب يجرب حاجة جديدة مش متعود عليها، وكمان علشان يوثق ده بالصور التذكارية، برضو ده هتلاحظه في قعدات الشاي اللي قدام كل بيت، الجزيرة فعلًا مدهشة في كل تفصيلة فيها.

الجزيرة دي معجونة بطيبة البسطاء وحنيتهم وجدعنة ولاد البلد، الخدمات فعلا مش متوفرة فيها إلى حد كبير، بس الناس هناك في كتف بعض، عارفين يحققوا معنى كلمة الدهب في معاملاتهم الحقيقية وطيبة قلبهم اللي ملهاش مثيل.

وإحنا كمان مستنينك تجرب يوم في جزيرة الدهب!