The Definitive Guide to Living in the Capital , Cairo , Egypt

الصورة: Nick Fewings

أكثر كابوس ممكن نخاف منه بسبب خطة الحكومة المصرية لتخفيف أحمال الكهرباء، هو لحظة انقطاع الكهرباء وإحنا أو اللي بنحبهم يكونوا داخل أسانسير! وعلشان كده مهم نبقى عارفين كيفية التصرف في موقف زي ده. تعالوا نتعرف على بعض النصائح اللي نشرتها صفحة “How to do بالعربي” واللي أهمها الحفاظ على الهدوء وعدم التوتر قدر المستطاع من خلال التنفس العميق.

تكون الأفضلية في وضع التعلق داخل الأسانسير أننا نبتعد عن الباب بدون أي محاولات لتحريكه، والامتناع عن القفز داخل الأسانسير لأن ده مش هيشغله تاني حسب المعتقد الخاطئ، بالعكس ممكن يتسبب في هبوط سريع مفاجئ وده هيكون كارثة أكبر من انقطاع الكهرباء، والأفضل الوقوف أو الجلوس بهدوء في آخر جزء من الأسانسير مبتعدين عن الأبواب وانتظار المساعدة. كمان مافيش أي داعي أنكم تضغطوا على كل الأزرار في وقت واحد ولا تشدوا الباب بإديكم، والأفضل تطلبوا النجدة من خلال زرار الطوارئ أو تخبطوا على الباب وحوائط الأسانسير علشان الناس تسمعكم.

فيه خطوة مهمة، وهي تشغيل كشاف الموبايل علشان الظلام مايعملكمش حالة ذعر، وتحددوا من خلاله الاتجاهات والأزرار وخاصة أزرار الطوارئ، ويفضل استخدام الضوء من الموبايل لفترة قصيرة علشان تحافظوا على بطاريتكم، ولو مافيش ضوء في الموبايل أو الأسانسير ابتعدوا عن الباب بهدوء وانتظروا النجدة.

في حالة أن زرار الطوارئ شغال تقدروا تطلبوا من المسئول أنه يفصل زر الكهرباء الداخلي للأسانسير وإنزالكم أو رفعكم لأقرب طابق لإخراجكم، وفي حالة انفتاح الباب فجأة بين طابقين خليكم هاديين وبلاش محاولات الخروج لأن ده هيكون خطر على حياتكم، والأفضل انتظار المساعدة، وفي حالة أن زرار الطوارئ لايعمل أتصلوا بشرطة النجدة على 122 أو الحماية المدنية على رقم 128 أو واحد من المعارف المتواجدين في العقار أو بالقرب منه.

الصراخ هيكون فيه اجهاد عليكم وكمان هيخلص الأكسجين، فعلشان كده افتكروا أن طلب النجدة بالطرق “تخبيط” على جدران أو باب الأسانسير لإحداث دوشة مش لتكسيره، وفي حالة إحساسكم بالخوف المرضي ناموا على ضهركم لأن ده هيكون أفضل صحيًا.

بنتمنى لكم السلامة، وبنتمى انتهاء خطة التحميل وعودة الكهرباء لطبيعتها!