The Definitive Guide to Living in the Capital , Cairo , Egypt

من أهم مميزات التكنولوجيا الحديثة أنها بقت توفر لنا طرق نقل خاصة أو جماعية عن طريق تطبيقات الموبايل. وفيه أكتر من تطبيق بيشتغلوا في مصر وناجحين أشهرهم طبعًا “أوبر” و”كريم”. ومؤخرًا وصل تطبيق Indrive العالمي لمصر، وخلال السطور الجاية هنقول لكم على كل اللي محتاجين تعرفوه عن التطبيق وده بعد ما استخدمناه أكتر من مرة.

Indrive هو تطبيق نقل ذكي تقدروا من خلاله تطلبوا عربية ملاكي، تنقلكم من مكان لمكان أو من مدينة لمدينة بشكل سهل وبسيط، وكمان بأسعار رخيصة ومتفق عليها قبل ما توافقوا على الرحلة، وهو شغال في 15 مدينة في مصر “القاهرة، السويس، بورسعيد، الإسكندرية، المنصورة، طنطا، الغردقة، الفيوم، أسيوط، المحلة الكبرى، الإسماعيلية، الأقصر، أسوان، الزقازيق، دمياط”.

بعد ما بتحملوا التطبيق وتعملوا حساب عليه، كل اللي عليكم تحددوا مكانكم تلقائي عبر خدمة الجي بي إس وكمان تحددوا المكان اللي أنتم هتتوجهوا إليه، بعدها بيظهر على التطبيق السعر المتوسط للرحلة، تقدروا توافقوا عليه وتطلبوا كابتن، أو تختاروا عربية تانية متوافقة مع السعر اللي يرضيكم.

الكابتن الخاص بتطبيق Indrive بيوصل لكم بسرعة كبيرة بحسب تجربتنا، مع مراعاة إنه فيه وقت ذروة.

جربنا الانتقال من الجيزة لمدينة نصر والعودة، وكان سعر الرحلة 57 جنيه في كل مرة، ومن الدقي لوسط البلد وكان السعر 18 جنيه، ومن مدينة نصر لمدينة شبين القناطر في القليوبية كان السعر 96 جنيه، وده أقل سعر في كل تطبيقات النقل الذكي الخاصة بالسيارات الملاكي في مصر.

ومن مميزات التطبيق أنه بيعرض لك تقييم الكابتن اللي بيقدم عرض واللي بيكون من 5 نجوم، وكمان بيعرض رأي الناس اللي تعاملت مع الكابتن ده، ومش بس كده كمان لو الكابتن لغى الرحلة بيبعتوا رسالة أنه في حالة عدم وجود سبب بيحظروا الأكونت الخاص بيه، والتطبيق بيوفر خدمة التواصل مع الكابتن من خلال الواتس آب أو من خلال الاتصال المباشر.

تقدروا تحملوا تطبيق Indrive لو أنتم من مستخدمي منتجات آبل من هنا.

ولو أنتم مستخدميي أندرويد تقدروا تحملوا التطبيق من هنا.

ولو عاوزين تعرفوا تفاصيل أكتر زوروا صفحتهم على الفيسبوك من هنا.