Mohammed Sabry
السواقة مشاكلها كتيرة. خاصة الأعطال اللي بتحصل على طرق السفر، أو الطرق السريعة. ساعتها الواحد بيكون في ورطة ومش عارف يتصرف إزاي. علشان كده في مجموعة من الشباب، قرروا يعملوا تطبيق “إنقاذ”، المتخصص في مشاكل وأعطال العربيات.
وحسب ما نشر موقع صحيفة “الشروق”، التطبيق ده بيقدم للمستخدمين 3 خدمات أساسية: شحن البطارية – تغيير الإطارات – طلب ونش. وده خلال دقائق قليلة، وغير الخدمات دي، التطبيق بيقدم على صفحته على فيسبوك، عدد من النصائح المتعلقة بالسلامة المرورية. وإزاي تتجنب الحوادث والأعطال.
محمد خريم، المدير التنفيذي للتطبيق، قال إن أهم الأسباب اللي دفعتهم لإطلاقه، شكاوى العملاء المتكررة من استغلال مقدمي الخدمات، بسبب وجودهم في موقف طاريء. ده غير غياب عامل الثقة والأمان. كمان ارتفاع معدلات حوادث السيارات بسبب الأعطال المفاجئة.
من أهم الحاجات اللي بتميز التطبيق، إنه بيقدم الخدمات للعملاء بأسعار ثابتة، ومُعلن عنها عليه. مع إمكانية طلب الخدمة من غير إنترنت. لحد دلوقتي هو متاح في القاهرة والجيزة. وفي خطة لتغطية كافة محافظات الجمهورية خلال 2019.
التطبيق متاح لنظام اندرويد وIOS من هنا. وتقدروا تعرفوا عنه أكتر على فيسبوك من هنا.
مقترح
مطاعم
3 أماكن في القاهرة بتعمل أحلى شاورما لبناني
احلى شاورما لبناني في القاهرة شاورما +3
معالم وسياحة
