تحويل القاهرة التاريخية لمتحف مفتوح
القاهرة التاريخية القاهرة متحف مفتوح تطوير القاهرة الإسلامية تطوير شارع المعز خطة تطوير القاهرة
Mohamed Talaat
الصورة الرئيسية لجامع الأقمر بعد التطوير
التطوير بيطول مصر كلها، وخاصة القاهرة التاريخية والخديوية، وفي الفترة الأخيرة شهدت القاهرة افتتاح مسجد الحسين ومسجد عمرو بن العاص والحاكم بأمر الله والظاهر بيبرس والسيدة نفيسة والأقمر، وما زال العمل جاري في بعض المساجد التانية وأهمها مسجد السيدة زينب، ده غير تطوير المناطق والمباني ونقل الورش وبناء الجراجات في المناطق المستهدفة، وهنعرفكم خطة التطوير الكاملة للقاهرة التاريخية في السطور الجاية واللي بتشمل تطوير شوارع وحارات القاهرة القديمة.
المناطق المستهدفة للتطوير في القاهرة التاريخية هي “الحسين – درب اللبانة – الجمالية – شارع المعز – محيط مسجد الحاكم بأمر الله – بوابة النصر – منشية ناصر”، والهدف منها تحسين الهوية البصرية للمباني وتطويرها وترميمها من الداخل والخارج، وكمان هيتم إعادة تصميم كل واجهات المباني السكنية علشان تكون على طراز العمارة الإسلامية وبما يتناسب مع المناطق المستهدفة ومكانتها.
في منطقة منشية ناصر هيتعمل مشروع سكني تجاري وهيكون مربوط بمحور جيهان السادات وهيتم تسليمها للأهالي المتضررين من مشروعات التطوير، وكمان هيتم نقل الورش اللي بتسبب إزعاج وخطورة على منطقة القاهرة التاريخية.
مشروع تطوير القاهرة التاريخية هيحولها لمتحف سياحي مفتوح وهيحافظ على المباني، وهيتم انشاء مشروعات تعليمية وثقافية وسوق تجاري، وحاليًا تم بالفعل تغيير واجهات العقارات للتصميم الإسلامي وبناء بلكونات جديدة وغلق القديم منها والغير مؤهل علشان تتماشى مع خطة التطوير، وكمان تم تنفيذ واجهات خشبية مخصصة علشان تكون مقاربة للواجهات القديمة والتصميم المعماري الحديث.
مناطق التطوير في القاهرة التاريخية هتشمل على 5 مناطق متكاملة أولهم منطقة مسجد الحاكم بأمر الله وباب النصر وباب الفتوح على مساحة 14 فدان، وتاني منطقة هتكون جنوب باب زويلة وهتشمل المناطق من بين شارع أحمد ماهر والدرب الجديد شمالًا، وعطفة السبكي جنوبًا، ومناطق قصبة رضوان والخيامية وحتى حمام القربية.
وثالث منطقة التطوير هيطولها منطقة حارة الروم وباب زويلة وهتضم المنطقة خلف وكالة نفيسة البيضاء حتى حارة الروم شمالًا، وشارع أحمد ماهر والدرب الجديد جنوبًا، على مساحة 8 أفدنة، والمنطقة الرابعة هتكون على مساحة 13.7 فدان وهتشمل محيط مسجد الحسين وشارع الأزهر وشارع سيد الدواخلي وشارع أم الغلام والدرب الأحمر وحتى تقاطع شارع قصر الشوق والجمالية، وأخيرا المنطقة الخامسة هتضم قلب درب اللبانة ووشارع سكة الكومي وشارع سكة المحجر وميدان القلعة وكمان شارع الرفاعي على مساحة 10.5 فدان.
مقترح
معالم وسياحة
زاوية أيدكين: حكاية أول خانقاه مملوكية في قلب القاهرة
اثار مملوكية في مصر خانقاه في القاهرة +2
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
