The Definitive Guide to Living in the Capital , Cairo , Egypt

الصورة الرئيسية: Jens Aber

القاهرة بتكون أجمل ما تشوفها في الوقت الصح، ومافيش أجمل من وقت الغروب علشان تشوفوا فيه القاهرة التاريخية بشكل مختلف، لأن وقت غروب الشمس بيكون مميز في إظهار جمال الطبيعة والتاريخ والحضارة وده علشان انعكاس ما تبقى من أشعة الشمس على الأماكن دي فبيديها حالة مختلفة، وبما أن موقع Yahoo Finance اختار مؤخرًا مصر ضمن أفضل 25 دولة فيها غروب الشمس، حبينا نعرفكم على 5 أماكن في العاصمة المصرية تشوفوا منها الغروب بشكل مختلف ومميز.

ساحة القلعة

قلعة صلاح الدين تقدروا تشوفوا منها الغروب والقاهرة الفاطمية، وبدأ صلاح الدين الأيوبي حفرها ولكن لم يتم استكمال بناءها في عهده لكن بناها السلطان الكامل بن العادل وبتحتوي على 4 أبواب و13 برج و4 قصور و4 مساجد ومتحفين ومدرسة وبئر تم حفرها على عمق 90 متر في الصخر، وسجن ودار صناعة.

برج القاهرة

تقدروا تشوفوا النيل والأهرامات والقاهرة التاريخية والآثار الاسلامية وقت الغروب من أعلى برج القاهرة، وتأسس برج القاهرة عام 1961 على شكل زهرة اللوتس وهو موجود بمنطقة الزمالك بالقاهرة وارتفاعه 187 متر، وبيتكون من 16 دور وتصميمه بيجمع بين الفن المعماري الأصيل والمعاصر.

المقطم

جبل المقطم من الأماكن اللي تقدروا تشوفوا منها غروب الشمس بشكل مختلف ومميز لأنكم بتبقوا شايفين القاهرة كلها من فوق، وتقدروا تقفوا على جبل المقطم اللي بيوصل ارتفاعه لـ375 متر عن القاهرة ومتوسط الارتفاع 240 متر، وهتشوفوا الغروب بينعكس على الآثار الاسلامية وحديقة الأزهر والنيل والاهرامات والقلعة وغيرها من الأماكن المميزة.

جراند نايل تاور

رغم سعره العالي نسبيًا، مهم تخوضوا تجربة زيارة المطعم الدوار لفندق جراند نايل تاور وقت الغروب لأنكم هتشوفوا القاهرة بشكل مختلف ومميز وكمان مش هيكون فيو واحد، لا ده المطعم هيلف بيكم علشان تشوفوا القاهرة من كل اتجاه، والمطعم الدوار موجود في الدور الـ40 من الفندق يعني هتشوفوا القاهرة بكل تاريخها وحضارتها.

النيل

رغم أن الرؤية هتكون محدودة لكن لو أنتم موجودين في قلب النيل داخل التاكسي النهري أو كروز من المراكب الكبيرة وحتى لو فلوكة هتشوفوا انعكاس غروب الشمس على النيل والمباني اللي حواليه بشكل مبهر وهتعيشوا لحظة جميلة جدًا مع النيل والغروب.