The Definitive Guide to Living in the Capital , Cairo , Egypt

القاهرة فيها كباري تاريخية مبهرة، لها قصص وحكايات، وكمان فيها لمسة جمالية تخطف العين. والكباري من الأماكن اللي ناس كتير بتروح تتصور عندها، خاصة إن التصوير مجاني، وفي الفترة الأخيرة، أصبح فيه عدد من الشباب الموهوب في التصوير، اللي معاهم كاميرات محترفة، وبيصوروك على الكوبري مقابل مبلغ رمزي، وبيطلعوا صور مبهجة وحلوة.

في السطور الجاية هنقول لكم على 5 كباري تاريخية في القاهرة تقدروا تتصوروا عندها وتعملوا ذكريات عظيمة.

قصر النيل

هو أول كوبري أنشئ في مصر لعبور نهر النيل وده كان سنة 1871 في عهد الخديو إسماعيل، وسمي بقصر النيل لأن كان فيه قصر جنبه ملك الأميرة زينب ابنة محمد علي، وتم هدمه وتجديده عام 1933 وسمي “كوبري الخديو إسماعيل”، قبل ما يرجع تاني لاسمه الأصلي، وفي بدايته ونهايته أسدين اسمهم “أسدين قصر النيل”.

إمبابة

هو كوبري تاريخي ملقب بكوبري قطار الصعيد، مبني من الحديد وبيربط بين القاهرة والجيزة واتبنى عام 1892، وهو عبارة عن كوبري لمرور القطارات وكوبري لمرور السيارات بحجم 1 سيارة في كل اتجاه، وكمان فيه ممر مشاة والتصوير فيه مميز.

المانسترلي

الصورة على الكوبري التاريخي الخشب بمليون صورة خاصة بعد تطويره، وهو مصمم ومزخرف بطريقة مميزة وفيه قبة خشب فوق اعمدته ومتين زي الكباري الحديد، وهو بيربط جزيرة الروضة بالجهة التانية لمصر القديمة، والكوبري مخصص للمشاة، وبعد تطويره أصبح من أهم الكباري اللي ممكن تتصوروا فيها صور تطلع مبهرة.

عباس

من جمال الكوبري وتميزه عدويةجاب سيرته في أشهر أغانيه “بنت السلطان”، وكمان فيه مقطع مخصص ليه لأنه من زمان مميز، وهو اتبنى سنة 1908، واتسمى على اسم الخديو عباس حلمي الثاني وبيربط بين جزيرة منيل الروضة والجيزة، والفيو بتاع النيل عليه تحفة ويستحق انكم تروحوا تتصوروا هناك.

بديعة

حاليًا اسمه كوبري الجلاء وهو بيتفتح ويتقفل زي “الهويس” علشان يعدي سفن، آه ده حقيقة، من الكباري اللي ليها تاريخ كبير وبيتميز أن تفاصيله كتير، وهو أشبه بهويس وبيربط ما بين منطقة الأوبرا وميدان الدقي، ومن المفارقات أن الكوبري ده كان اسمه كوبري الإنجليز لما افتتح سنة 1914، والمصريين رفضوا الإسم وسموه كوبري “بديعة” وفي عام 1952 تم تغيير اسمه لكوبري “الجلاء”.