تأجير السيارات في القاهرة
Waleed Abuarab
تأجير السيارات الملاكي نشاط منتشر في العاصمة وليه مكاتب متخصصة في كل
المناطق والأحياء. وهو البديل الأهم للعربية الملاكي في حالة إنها تعطل أو للناس
اللي مش بـ تحب تركب مواصلات أو للرحلات الطويلة برة القاهرة، وطبعاً للأجانب اللي
قاعدين فترات محددة في مصر.
تأجير العربية بـ يحتاج بعض الاوراق ومنها صورة البطاقة الشخصية وصورة رخصة
القيادة ده في حالة أن المستأجر مصري، وطبعاً بـ يتم التوقيع على وصل أمانة وده
طبعاً لضمان حقوق المؤجر في حال حدوث أي تلفيات للعربية. للأجانب والعرب بـ يكون
مطلوب صورة جواز السفر وصورة رخصة القيادة الدولية وبرضه بـ يطلب وصولات أمانة أو
ممكن ياخد كارت إئتمان (Credit Card ) فيه رصيد كافي ومش بـ
يسحب منه أي فلوس، بس بـ يكون ضمان للمكتب لسحب المبالغ المطلوبة في حال تعرض
العربية لحادث.
ممكن يكون الإيجار لمدة 24 ساعة أو لمدة شهر ويتم التجديد، بس مكاتب كتيرة
مش بـ توافق على التأجير ليوم واحد وبـ يعملوا حد أدنى لمدة الإيجار 3 أو 4 أيام،
وطبعاً بـ يكون فيه حد أقصى للإستخدام بـ يتحسب بالكيلومتر في اليوم، وعادة بـ
يكون من 100 لـ125 كم في اليوم، وكل كيلومتر زيادة بـ يكون له حساب مختلف عن
المبلغ المتفق عليه.
شركات ومكاتب التأجير بـ يكون عندها موديلات واحجام كتير من العربيات بس في
كام ماركة بـ يكونوا متوفرين بكثرة في كل الشركات وهي: الهيونداي بموديلاتها –
المتسوبيشي لانسر – التويوتا كورولا. لكن فيه مكاتب بـ تأجر موديلات حديثة زي البيـﭼو
307 و 407، متسوبيشي ﭘـاﭼـيرو، تويوتا ﭘـرادو، ميرسيدس E Class و S
Class ، جراند شيروكي، وبعض موديلات الكرايسلر،
بس طبعاً الفرق في أسعار التأجير بين المجموعة دي واللي فاتت كبير جداً.
الأسعار بـ تبتدي من 120 جنيه في اليوم وده للموديلات البسيطة وغالباً بـ
تبقى في المكاتب اللي في الأحياء الشعبية، وبـ توصل لـ1500 جنيه في اليوم لليموزين
والموديلات الفخمة. بس المتوسط بـ يكون من 200 لـ300 جنيه في اليوم وكل ما مدة
الإيجار بـ تزيد كل ما الأسعار بـ تقل، فيستحسن أنك تأجر لفترات طويلة مش يوم واحد
أو إتنين عشان توفر فلوس. وفيه مكاتب بـ تضيف 10 % ضريبة مبيعات على المبلغ
المدفوع.
الليموزين الطويل اللي بـ يتأجر في الأفراح والزفاف نظامه مختلف في الإيجار
وبـ يكون لمدة من 6 لـ10 ساعات بالسواق، وبـ يسموه “ليموزين ستريتش”
وأنواعها هي :لينكولن، كاديلاك، وكرايسلر، وأسعارها بـ تبدأ من حوالي 1200 جنيه لموديلات
الكاديلاك القديمة مو1993 مثلاً وبـ توصل لـ3300 جنيه للينكولن الموديلات الجديدة
مو2009 على سبيل المثال، وفيه موديلات وسط تأجيرها بـ يكون في متوسط 2500 جنيه،
وأعلى سعر ممكن توصله هو 4500 جنيه للـ6 ساعات بالسواق وده لموديل السنة اللي إحنا
فيها، والأسعار مش بس بـ تختلف حسب الموديل إنما كمان على حسب طول العربية والفرش
بتاعها من جوه. ممكن كمان تأجر عربيات BMW الفئة السابعة لنفس الغرض
وسعرها بـ يكون أقل شوية؛ 900 جنيه للـ7 ساعات، أو ممكن الميرسيدس E 250 وسعرها 1200 جنيه.
إستلام العربية بـ يكون من قدام مكتب الإيجار، وكذلك التسليم بعد إنتهاء
الإيجار وساعتها بـ تستلم أي أوراق خاصة بيك وتدفع أي مبالغ مطلوبة، والحجز بـ
يكون بالتليفون أولاً بس لازم تروح تدفع مقدم أو مبلغ الإيجار كله وتأكد الحجز قبلها
بيوم، وطبعاً مش شرط أول ما تتصل تلاقي الموديل اللي انت عايزه فـ ممكن تبقى
موجودة بس متأجرة في الوقت اللي انت عايزها فيه.
دي كانت فكرة عامة عن تأجير السيارات في القاهرة ومش هـ تختلف عنها كتير في
المحافظات التانية، كل اللي هـ تحتاج تعمله إنك تكلم الشركة اللي عايز تأجر منها
في التليفون، أو تروح المكاتب بـ نفسك اللي بقت منتشرة في كل شوارع وسط البلد ومصر
الجديدة ومدينة نصر والمعادي والمهندسين، وممكن تتابعوا الموقع بتاعنا اللي مدرج
عليه بعض أرقام وعناوين شركات خدمات سيارات وليموزين.
