The Definitive Guide to Living in the Capital , Cairo , Egypt

في فترة قصيرة، أصبح المتحف القومي للحضارة بالفسطاط، واحد من أهم المتاحف المصرية الموجودة في العاصمة.. وقدر في وقت قياسي يجذب عدد كبير من عشاق الحضارة المصرية القديمة.. في الموضوع ده هنعرفكم على 7 تصريحات مهمة قالهم الدكتور أحمد غنيم الرئيس التنفيذي للمتحف في أحدث حوار له مع وكالة أنباء الشرق الأوسط.

1 – كشف الدكتور أحمد غنيم، إن المتحف من وقت افتتاحه في أبريل اللي فات بيستقبل شهريًا حوالي 80 ألف زائر، علشان يتفرجوا على 1600 قطعة أثرية في قاعة العرض المركزية بالإضافة إلى قاعة المومياوات ومتعلقات الملوك والملكات الموجودة في قاعة المومياوات.

2 – وأضاف الدكتور غنيم، إن المتحف موجود كفكرة من سنة 1982، لكن كأي مشروع قومي بالحجم ده، واجه تحديين مهمين؛ الأول احتياجه لتمويل كبير والثاني إرادة سياسية قوية، وده اللي أجل التنفيذ لحد سنة 2002، وهي السنة اللي بدأ فيها التنفيذ الفعلي للمشروع، وبعدها واجه عثرات منها الأحداث السياسية في 2011 و2013 واللي أدت لتوقف العمل في المتحف لأسباب مالية وظروف سياسية.

3 – وكمل “غنيم” أن الافتتاح الجزئي تم في 2016 بقاعة العرض المؤقت، وبعدها كان الافتتاح الأهم بقاعة العرض المركزية وقاعة المومياوات في 3 أبريل 2021 بحضور الرئيس عبد الفتاح السيسي في هذا الحدث العالمي.

4 – وبحسب “غنيم”، قاعة العرض المركزية فيها حوالي 1600 قطعة بالإضافة إلى قاعة المومياوات ومتعلقات الملوك والملكات الموجودة في قاعة المومياوات، فضلا عن نحو 50 ألف قطعة أثرية في مخازن المتحف.

5 – وعن تكلفة إنشاء المتحف قال الدكتور “غنيم”، إن تكلفة إنشاء المتحف وصلت لـ 2 مليار جنيه أغلبيتها والشق الأعظم منها دفعته الحكومة المصرية.

6 – وكشف عن أن عدد الزائرين بيصل لنحو 80 ألف زائر شهريًا من وقت الافتتاح، وإن أعداد الزائرين بتختلف من شهر للتاني، على سبيل المثال في يوليو وأغسطس استقبل المتحف أكبر عدد من الزائرين، كمان تركيبة الزائرين بتختلف من شهر للتاني، فمثلًا خلال الشهرين اللي فاتوا لوحظ ارتفاع عدد الزائرين من الأجانب وطلبة المدارس.

7 – وعن سؤال هل المتحف بيتلقى دعم خارجي، قال الدكتور “غنيم” إن الدعم من اليونسكو طفيف جدًا، ولكن دعم وزارة السياحة والآثار لسة موجود بقوة لإن المتحف تابع لصندوق إنقاذ آثار النوبة، وفي الفترة الأخيرة بدأت الإيرادات تغطي تكاليف التشغيل ولكن مع دخول التنفيذ في الكثير من الأمور الأخرى زي المعامل ومصروفات الترميم بدأت المصروفات تزيد، وأضاف أن فيه عقد تم توقيعه مع مستثمر مصري لتشغيل وإدارة الخدمات بالمتحف، لكن إدارة كل ما هو أثري هتكون للحكومة المصرية.