The Definitive Guide to Living in the Capital , Cairo , Egypt

الاحتباس الحراري، والانبعاثات الكربونية، والتغير المناخي، كلها مواضيع مخيفة ومقلقة، والعالم كله مهتم بيها وبيتكلم عنها، وانتشر التوعية بأسبابها وكوارثها بشكل كبير في العالم كله بمختلف الوسائل الإعلامية المتاحة.

النهارده، وعندنا في مصر، ومش لأول مرة، لكن المرة دي مختلفة ومميزة، تم الإعلان عن إطلاق حملة جديدة بعنوان “بلاستك ب ح” (ب ح هي كلمة في اللغة المصرية القديمة ومعناها “النهاية” ) هتبدأ من الإسكندرية وهتوصل لباقى محافظات مصر.

الحملة نظمها، وأشرف عليها وشارك فيها مجموعة كيانات قضيتها الأساسية هي الحفاظ على البيئة، ومنها  “جرينيش” و “بانلاستيك” واللي انضموا مؤخرًا لـ”جو كلين” و”مركز المنتزة” للرياضات المائية و”ولاد البلد” علشان يقدموا الدعم البيئي، والتوعية اللازمة بمخاطر البلاستيك على البيئة المائية، وتأثيره الكبير في زيادة التلوث، من وده عن طريق إقامة تدريبات في “مركز جزويت الثقافي” في الإسكندرية، ده غير تنظيم حدث كبير لتنظيف الشواطئ وهيشارك فيه حوالي ٣٠٠ متطوع لحد دلوقتي.

أما بالنسبة لـ “جرينيش” فكان إيمانهم بإن العمل مع شركاء محليين بيخلق تأثير مستدام، فقررت تبدأ برنامج تدريبي للمؤسسات والجماعات والأفراد المهتمين بالعمل في مجال الوعي البيئي،وهيتناول التدريب مشاكل البيئية في الأسكندرية، وكيفية نشر الوعي البيئي بالمشكلات دي من خلال الحملات واستخدام مواقع التواصل الاجتماعي أو الفنون البصرية والحركية.

بعد التدريب، هيكون في إيفينت تنظيف للشواطئ، وهيشمل توعية وورشة لإعادة التدوير، هيكون هدفها منح فرصة للمشاركين لتطبيق الآليات اللي اتعلموها خلال أيام التدريب، جنب رفع الوعي بين الناس بشكل عام حوالين كارثة المخلفات البلاستيكية في البحر الأبيض المتوسط.

“جرينيش” بتتوقع إن الورشة دي هتكون حل مستدام للمشاركين فيها، وبتهدف للحد من من اهدار المواد الصلبة بشكل عام، وهتديهم القدرة على تنظيم حملات للتنظيف في مجتمعاتهم المحلية، والمساهمة في إزالة كميات كبيرة من المواد الصلبة الملوثة للشواطئ.

بداية حملة “بلاستيك ب ح” من محافظة الإسكندرية ليها وجهة نظر، وهي إن نسبة التلوث من المخلفات البلاستيكية على شواطئ اسكندرية وصلت لـ 12.7  كيلوجرام لكل كيلومتر، وبكده نقدر نقول إن الأسكندرية واحدة من أكثر المحافظات المطلة على البحر المتوسط معاناة من التلوث الناشئ من المخلفات البلاستيكية.

بعد الأسكندرية، هتتنقل الحملة لـ 5 مدن تانية، وهي “شرم الشيخ” و”المنيا” و”الأقصر” و”كفر الشيخ” و”القصير” ومن المتوقع والمأمول إن الحملة تساهم في نشر الوعي بين المجتمعات المختلفة دي بخصوص التحديات البيئية اللي بنواجهها، زي أزمة الصرف الصحي وتنظيم المخلفات.