The Definitive Guide to Living in the Capital , Cairo , Egypt

الصور: حاتم مشير

الحديقة الدولية واحدة من أعرق الحدائق في القاهرة، وعلامة مميزة من علامات مدينة نصر. مؤخرًا انتشر كلام عن إن الدولة قررت رفع سعر تذكرة الحديقة بعد تطويرها، فهل الكلام ده حقيقي؟ في السطور الجاية هتعرفوا الإجابة، وهتتعرفوا على معلومات عن تطوير الحديقة، مع عرض معلومات عنها.

حقيقة رفع زيادة تذكرة الحديقة الدولية

من ساعات، كشف اللواء إبراهيم عوض، المتحدث الرسمي باسم محافظة القاهرة، أنه مش هيتم إزالة أي أشجار داخل الحديقة الدولية، وإن المحافظة شغالة حاليًا على تنمية وتطوير الحديقة.

 وأضاف خلال تصريحات إعلامية إن العمل في رفع كفاءة وتطوير الحديقة الدولية، شغال حاليًا، وأكد إنه مش هيتم رفع ثمن التذكرة الخاصة بدخول الحديقة، وهتفضل بـ10 جنيه.

 وتابع إن الحديقة المقامة على مساحة 55 فدان، بتضم 4 أركان بمساحة 3500 متر، بيتم العمل حاليًا على رفع كفاءتها لتنمية موارد الحديقة، بالإضافة إلى تجهيز مباني سابقة التجهيز (مش خرسانية) لافتتاح محلات طعام خلال شهر داخل الحديقة الدولية.

معلومات عن الحديقة الدولية

الحديقة الدولية هي حديقة عامة في شارع عباس العقاد في مدينة نصر بالقاهرة. تم تسميتها بالدولية لأن لكل دولة جزء مميز من الحديقة، فيه أشهر أشجارها وحيواناتها وأبرز الحاجات اللي بتتميز بيها، على سبيل المثال، الحديقة فيها قسم خاص لدولة الإمارات، وللسعودية، والبحرين، واليابان وغيرها من دول العالم.

تم افتتاح الحديقة سنة 1987، واللي فاتتحها هو الرئيس الراحل محمد حسني مبارك. والحديقة على مساحة 55 فدان وفيها مساحات خضراء بتقدر بحوالي 70% من مساحة الحديقة.

بتحتوي الحديقة على مجموعة كبيرة من المعالم، ولتسهيل الأمر خلونا نقسمها لـ3 أقسام، وهي القسم العربي، والقسم المصري، والقسم الأجنبي، وبيضم كل قسم مجموعة أقسام صغيرة تخص دول مختلفة، وداخل كل قسم صغير هتلاقوا مجموعة من النباتات اللي بتخص الدولة صاحبة القسم ومجموعة من الحيوانات ومظاهر الثقافة ومعلومات بسيطة عنها.

بعد الانتهاء من تطويرها وافتتاحها رسميًا، هتقدروا تدخلوا الحديقة طول أيام الأسبوع من غير أي إجازات.