The Definitive Guide to Living in the Capital , Cairo , Egypt

مركز حلوان الكبريتي للروماتيزم والطب أو المعروف بـ “كابريتاج حلوان” واللي يعتبر واحد من أقدم المقاصد السياحية في مصر، وممكن بسهولة توصلوا له من  مدخل حي حلوان عن طريق الكورنيش، وله وسائل مواصلات متوفرة لو مش معاك عربية، وهو مقصد سياحي بييجي له الناس من كل مكان في العالم.

الجميل في الموضوع هو إن “كابريتاج حلوان” هيرجع تاني لرونقه بعد إعلان محافظة القاهرة عن خطة عمل لتطويره ورجوعه للخدمة بشكل كامل بعد إنقطاع قعد فترة كبيرة، والخطة هتشمل إقامة مشروعات سياحية وصحية بتكلفة استثمارية مليار جنيه.

وعلشان كده النهاردة هنقولكم على 5 معلومات عنه يمكن تكونوا أول مرة تعرفوها:

1- أول مكتشف لمياه حلوان الكبريتية، كان المهندس “إيمحوتب” فى عهد الملك “زوسر” حوالي سنة 2900 قبل الميلاد، ومع الوقت والزمن اتطور مركز حلوان الكبريتي للروماتيزم أو “كابريتاج حلوان” لحد ما اتبنى بشكله الحالي سنة 1889 واتجدد سنة 1955 وكان أحد الأماكن المفضلة للملك فاروق.

2- منطقة “كابرتاج” حلوان مساحتها 45 فدان، والمركز مكون من 38 غرفة للعلاج بالمياه الكبريتية، ده غير الإستراحة.

3- غرف الاستراحة الموجودة في المركز وسط الأشجار والطبيعة، وده بيدي راحة نفسية كبيرة جدًا.

4- المركز فيه مجموعة من الأطباء المتخصصين في أمراض الروماتيزم والعلاج الطبيعي.

5- موقع المركز الجغرافي بيساعد كتير في عملية الاستشفاء، وده بسبب جفاف الجو المحيط بيه والشمس الموجودة 8 ساعات على مدار اليوم طول السنة تقريبًا، ده غير إن فيه عيون كيميائية وطبيعية  مخصصة للعلاج مفيش زيها.