The Definitive Guide to Living in the Capital , Cairo , Egypt

بمجرد ما سمعنا عن محل اسمه “بستاشيو” في المهندسين. قررنا في كايرو 360 نروح نجربه. وننقل لكم تجربتنا في المكان، اللي بيتميز بديكورات جميلة، وأسعار معقولة.

جربنا في المكان كحك العيد، اللي في منه بالعجوة والملبن. سعر الكيلو 130 جنيه. الطعم رهيب، لكن الكحك السادة اللي كان الكيلو منه بـ 120 جنيه، أحلى بكتير. بيدوب وأنت بتاكله.

أما الغُريبة، فاحنا بنشهد لهم ونرفع القبة، على جمال الطعم اللي بيخليك تفتكر أيام زمان، ولمة العيلة لعمل لوازم العيد. وريحتها اللي مسيطر عليها السمنة البلدي. سعر الكيلو سادة منها بـ 130 جنيه. وباللوز 190 جنيه. وإحنا شايفين إن فرق السعر عالي جدًا، خاصة أن الطعم واحد تقريبًا.

البيتي فور ده بقي له مكانة خاصة عندنا. وطعمه بينشر الحب وسط اللي بياكلوه. فيه منه السادة بـ 140  جنيه، واللوكس 180 جنيه، والفاخر 190 جنيه (وده مزين بالفستق مع شيكولاته نوتيلا). وكمان عندهم نوع تاني خلانا مش قادرين نقاوم جماله، وكان سعره 220 جنيه، ومطعم باللوز والنوتيلا والبندق.

أما البسكويت فهو خفيف ولونه جميل ويشرح القلب. ويا حلاوة البسكويت اللي معمول بالبرتقال. وده الكيلو بتاعه بـ 120 جنيه. وكمان عاملين بسكويت نشادر بـ 110 جنيه للكيلو.

الاحترافية اللي شوفناها في المكان ده بتقول إننا أمام تجربة متكاملة، بتميزها جودة المنتجات وخدمة العملاء الهايلة، وبنتوقع إن بستاشيو خلال فترة قريبة هيبقى له شنة ورنة في مصر. وهيكون منافس قوي، وهيبقى له فروع في كل مكان.

وأخيرًا..

بيستاشيو موجود في 22 شارع الحجاز – متفرع من شارع لبنان – المهندسين
وكمان عندهم خدمة توصيل من خلال رقم 0233441822
01280772002