The Definitive Guide to Living in the Capital , Cairo , Egypt

كأس العالم فيفا لكرة القدم هيوصل القاهرة ضمن جولته الرابعة من كوكاكولا، يوم 15 و 16 مارس. وهتقام احتفاليات الزيارة دي تحت رعاية وزارة الشباب والرياضة المصرية، وبتهدف لإتاحة الفرصة لمشجعي كرة القدم المصريين لمشاهدة  الكأس اللي بيعتبر أكبر جايزة في بطولات كرة القدم في العالم، وكمان للاحتفال بتأهل مصر لبطولة كأس العالم فيفا لكرة القدم بعد غياب 28 سنة عن الساحة الكروية العالمية.

هتقوم شركة “كوكاكولا” بالتعاون مع “فيفا” بجولة شاملة لكأس العالم، هتتضمن زيارة 91 مدينة و51 بلد في ست قارات بهدف منح الملايين في أنحاء العالم فرصة الاستعداد لأكبر بطولة عالمية بينتظرها الجميع بشوق وهي بطولة كأس العالم فيفا لكرة القدم 2018.

ومن خلال إقامة الجولة العالمية دي، بتدعو كوكاكولا والفيفا جميع المشجعين للحصول على نظرة عن قرب على الكأس الأصلي اللي هتقدمه الفيفا للبلد اللي هيفوز بلقب بطولة كأس العالم لكرة القدم. وبالنسبة لآلاف المشجعين، هتكون دي فرصة فريده  لمشاهدة الكأس ده اللي بيعتبر رمز مهم في كرة القدم.

وبالمناسبة دي قال جياني انفانتينو رئيس الاتحاد الدولي لكرة القدم فيفا:” في عالم الرياضة مافيش رمز أقوى من كأس العالم فيفا لكرة القدم. فالكل فاهم أهمية الكأس ده في توحيد الناس. وإحنا سعداء جدًا لشراكتنا مع كوكاكولا مرة تانية لإتاحة الفرصة لمشجعي كرة القدم في جميع أنحاء العالم لمشاهدة الكأس”.

وانطلقت جولة كأس العالم FIFA مع كوكا كولا في سبتمبر 2017 في روسيا، وهيزور الكأس أكثر من 50 بلدً في ست قارات وهيقطع مسافة 126,000 كيلو متر خلال تسع شهور لحد ميعاد بطولة كأس العالم لكرة القدم 2018 في روسيا.

والكأس هيوصل مصر من ساحل العاج، وهيغادرها لنابولي في إيطاليا علشان يكمل جولة أوروبية سريعة قبل ما يقطع آلاف الأميال علشان يوصل الأرجنتين.

وزير الشباب والرياضة المصري المهندس/ خالد عبد العزيز قال “إحنا فخورين بزيارة كأس العالم لمصر السنة دي، خصوصًا بعد تأهل فريقنا الوطني للبطولة، وبنأكد دعمنا الكامل لاحتفال الوطني ده اللي بيبرز  قدرة المصريين على التحدي والتوحد والوصول إلى العظمة، فريقنا الوطني اتمكن يفرح المصريين بتحقيق حلم طال انتظاره 28 سنة، وبنتمنى مشاهدة الفريق وهو بيبذل أقصى جهوده خلال بطولة كأس العالم لكرة القدم”.

وقال كريم صلاح الدين، المدير العام لكوكاكولا فى مصر: “مصر قدرت أخيرًا تتأهل لبطولة كأس العالم بعد انتظار دام 28 سنة. لما بيتحد المصريين بيصنعوا التاريخ. وهيشهد عام 2018 وحده المصريين ووقوفهم جنبًا إلى جنب في بطولة كأس العالم فيفا لكرة القدم. وعلشان كده حرصت كوكاكولا أن مصر تكون محطة ضمن جولة كأس العالم علشان المصريين يحتفلوا بالمناسبة دي، خصوصًا اللي مش هتتاح لهم الفرصة للسفر إلى روسيا لمشاهدة الفريق القومي أثناء المنافسة على اللقب”.

وأضاف: “على الرغم من أنها مش المرة الأولى اللي بيزور فيها الكأس مصر، لكن تأهل الفريق القومي لنهائيات كأس العالم هيعطي الزيارة طابع مختلف. لإن المصريين هيستمتعوا بلعبة كرة القدم من خلال مشاهدة أهم رموز النصر فيها وهو الكأس”.

جدير بالذكر أن كوكا كولا ستنظم العديد من الأنشطة على هامش الزيارة اللي هتجري خلال يومي 15 و 16 مارس احتفالًا بزيارة الكأس لمصر.

علشان تتعرفوا على أحدث المستجدات في جولة كأس العالم لكرة القدم برعاية كوكاكولا تقدروا تزوروا الموقع الرسمي بالضغط هنا، والصفحة الرسمية على فيسبوك  بالضغط هنا، وصفحة انستجرام الرسمية من خلال الضغط هنا.

جدير بالذكر إن شراكة كوكاكولا وفيفا بدأت من سنة 1974، وأصبحت كوكاكولا الراعي الرسمي لكأس العالم من سنة 1978. ومن سنة 1950 إعلانات كوكا كولا بتملى استادات كأس العالم، وده أمر بيخلي كوكاكولا داعم دايم لكرة القدم على جميع المستويات. وبتعتبر دي الجولة الرابعة اللي بتتعاون فيها كوكاكولا مع الفيفا.