بالأسعار.. 5 خروجات صيفية جدًا في القاهرة
أجمل خروجة الأزهر بارك جزيرة المعادي حديقة الميرلاند حديقة عابدين خروجات الصيف خروجات حدائق فاميلي بارك
Mohamed Talaat
المصريين مش هيبطلوا خروجات حتى في أشد درجات الحرارة، خاصةً أن خروجاتهم، وتحديدًا العائلية، بتكون متنفس حقيقي لهم، ولكن في ظل ارتفاع درجات الحرارة والتغير المناخي بقينا ندور على خروجات في أماكن مفتوحة، وتكون فيها كل حاجة بنحتاجها في خروجاتنا، وعلشان كده هنعرفكم النهاردة على 5 خروجات تنفع في الأجواء الصيفية وهتكون متكاملة من حيث الإنبساط وسط الخضرة وفيها أكل وشرب وأماكن تصوير وركوب عجل وكل حاجة ممكن نحتاجها علشان نستمتع.
الميرلاند
حديقة الميرلاند في مصر الجديدة من الأماكن المميزة اللي ممكن نخرج فيها وسعر التذكرة 20 جنيه، وهتلاقوا فيها كيدز إيريا ومطاعم وكافيهات ومساحات خضراء للقعدة والاستمتاع بالجو والخروجة.
حديقة عابدين
حديقة عابدين الموجودة أمام القصر الجمهوري من الأماكن المميزة اللي متاح فيها الخروج وسط الخضرة والمطاعم والكافيهات وكمان فيها قعدات مجانية وسعر التذكرة 5 جنيه.
جزيرة المعادي
من الأماكن المفتوحة الموجودة في وسط النيل، وهتستمتعوا هناك بالخضرة والنباتات والقعدة الحلوة والمطاعم والكافيهات، وسعر التذكرة 25 جنيه، وكمان فيها ركوب خيل وعجل وأتوبيس نهري وكيدز إيريا وغيرها بأسعار مختلفة لكل لعبة.
الأزهر بارك
الخروجة الأجمل في القاهرة! لأنكم بتشوفوا منها العاصمة المصرية بشكل مختلف وهتلاقوا فيها كيدز إيريا منها ألعاب مجانية ومطاعم وكافيهات بفيو مميز والتصوير هناك حاجة تانية، وسعر التذكرة 40 جنيه للكبار و30 جنيه للأطفال ومسموح بدخول الأكل.
حديقة الأسرة
حديقة الأسرة أو فاميلي بارك في الرحاب من الأماكن المميزة اللي تقدروا تزوروها في الصيف، وهي تصنف ضمن أكبر الحدائق في مصر، وفيها هتلاقوا النهر السحري وحديقة حيوان وكيدز إيريا وألعاب مختلفة ومساحات شاسعة من الخضرة وسعر تذكرة الدخول 30 جنيه، والألعاب بتبدأ من 10 جنيه.
