The Definitive Guide to Living in the Capital , Cairo , Egypt

حيث أن ده وقتها، وأن كتير مننا متطلع للسفرية دي، وأننا هنلاقي كل جهات تنظيم الرحلات الداخلية مركزة أوي معاها.. فخلونا كده نقول لكم على شوية نصايح لازم تعرفوها قبل ما تطلعوا جبل موسى أو الطور في رحلتكم لسانت كاترين، علشان تضمنوا رحلة ممتعة وآمنة.

1- آخر حاجة هتحب تتعرض لها في رحلة من النوع ده هي أنك تبقى “ملخوم” أو حركتك تقيلة، وبالتالي اعمل حسابك أن الشنطة اللي طالع بيها ماتحتويش على أي حاجة غير لو متأكد 100% أنك محتاجها وهتستعملها.

2- طبعًا تسمع عن “علقة” الجو المتلِّج هناك، علشان تقاوم الموضوع ده محتاج ماتطلعش بالتقيل من البداية، كده كده هتعرق وهتسخن وأنت طالع ولو لبست تقيل من البداية هتبقى محتاج تقلعه فهتبرد جامد.. خلي لبسك متدرج، وماتنقلش على مستوى تاني من اللبس غير لما تبقى فعلًا محتاج تتقل، وحَوِّش آخر مستوى من اللبس ده لما توصل القمة وتقعد فوق، واعمل حسابك أن اللبس يكون سهل في خلعه ولبسه علشان وأنت نازل بالنهار الجو هيبقى حر نسبيًا وهتحتاج تنزل بملابس أخف.

3- كل ما تريح أكتر كل ما هتتعب أكتر، وأنت طالع الجبل يفضل أنك ما تريحش إلا على فترات متباعدة جدًا وتبقى الراحة دقايق معدودة وبعدين تكمل.. ده لسببين: الأول أنك بتبقى عرقان وأنت طالع فلما بتريح هتدي لنفسك فرصة للشعور بالبرد، والثاني أن الحمل المقطع ده على العضلات هيعرضها للشد والإجهاد بصورة أكبر.

4- الدنيا بتكون زحمة جدًا عادةً في الوقت ده من السنة، وبالتالي ففرصة أنك تلاقي حمامات فاضية في أي رست على الطريق صعبة جدًا، ده غير أن الحمامات الموجودة كلها بتعتبر خدمة بفلوس، وبفلوس أكتر من المعتاد، علشان كده احرص أن معدتك ماتبقاش مليانة قبل ما تطلع، ولما تشرب مية اشرب جرعات صغيرة على فترات متباعدة وقت الحاجة فقط، والأكل خليه برضه شوكولاتات أو بسكوتات أو تمر، بلاش سندوتشات أو أي أكل دسم.

5- الناس اللي ضغطها واطي تاخد بالها من قصة الشوكولاتات والحاجات المسكرة الكتير دي، علشان هتلاقي ضغطها وطي جامد ومش هتقدر تكمل، خليها قضمة واحدة من الشوكولاتة على فترات، أو بسكوتاية واحدة من الكيس على فترات برضه، وهكذا.

6- وأنت طالع هتلاقي بدو كتير معاهم جمال بيعرضوا عليك تستخدمها في الطلوع أو النزول، نحب نقولك أن ده اختيار متعب أكتر في حالة الطلوع على الأقل، إيدك بتكون شبه متجمدة ومش هتبقى مالك نفسك في القعدة والوقوع خطر لأنك لو –لا قدر الله- وقعت هتقع على صخور مش رملة، ده غير أنك هتبقى مُعرض للبرد والهوا بشكل أكبر لأنك مابقيتش وسط الناس، فبلاش أحسن.

7- وسط الزحمة دي مرحلة السلالم اللي في آخر طريق جبل موسى بتكون مرحلة خطر شوية، فخد بالك وانصح اللي حواليك ياخدوا بالهم، وبلاش التدافع والفهلوة بتوع المصريين، إحنا مش في سبق، ويهمنا كلنا نروح بسلام.. وبلاش برضه الطرق المختصرة بالليل لأنك مش بتبقى شايف تضاريسها أوي ومش كاشفها بالكامل

8- طول مانت طالع أو نازل ركز على مكان رجلك، بص تحتك، إوعى عينك تروح بعيد، اللي تحتك مش طريق ممهد، كله صخور وأسهل حاجة أن رجلك تتحط في المكان الغلط فتبقى أقل الخساير أنها تلتوي وتطلع بقية الطريق متكدر ومحمل عليها وهي بتوجعك، فركز أنك دايمًا تبقى باصص على الطريق علشان تتحرك صح وخطواتك دايمًا تبقى صحيحة وثابتة.

9- لو ربنا قدر واتزحلقت أو اختل توازنك ركز في أنك تمسك في أقرب حاجة ثابتة ماتمسكش حاجة متحركة، يعني ماتمسكش في زميلك مثلًا علشان ماتخدوش معاك في السكة، امسك في صخرة، وصدَّر إيدك دايمًا في الوقوع علشان ماتضرش جسمك.

10- ماتاخدش معاك صاحبك الفرفور، خليه لخروجات السينما والحفلات، أو سفريات الاستجمام.. هيكدرك ويخلي حركتك بطيئة وغالبًا مش هتعرف تكمل للآخر وهتضيع عليك هدفك من الرحلة.

ومن الكماليات اللي نحب نقولها على الهامش: اعمل حسابك في أي مرطب للشفايف علشان البرد بينشفها وهتتشقق وتفضل مضايقاك كام يوم، واعمل حسابك برضه في مرهم أو جيل للالتهابات لو الاحتكاك في المناطق الممتلئة بيعمل لك مشاكل.

سفرية سعيدة.