النهارده في القاهرة: من الزار للجاز للبيانو.. مزيكا وأغاني من كل لون
Cairo 360
كل يوم في القاهرة فيه جديد، حفلات وعروض ولقاءات وإيفينتات. وإحنا دايمًا في كايرو 360 بنحاول نخلي أجندتنا ملمة بكل جديد، علشان مايفوتكوش أي حاجة. تعالوا نشوف النهارده الأجندة مخبية لنا إيه:
علبة ألوان النهاردة بتستضيف داليا فريد، مع الثلاثي جورج قولته وسمير واصف وكريم عدنان قطب. مع بعض هيقدموا أغاني الجاز الخاصة بالكريسماس. الحفلة هتبدأ الساعة 8 مساءً. وسعر التذكرة: 60 جنيه.
الظاهر إن أجواء الكريسماس مسيطرة بشكل قوي وملحوظ، لأن مساحة رووم في جاردن سيتي النهارده برضه هتستضيف حفلة لأغاني الكريسماس والميلاد. بيشارك فيها مجموعة من الموسيقيين والفنانين، عندهم شغف المزيكا والغناء. الحفلة هتبدأ الساعة 8 مساءً. وسعر التذكرة: 50 جنيه.
وطالما وصلنا جاردن سيتي يبقى نعدي بالمرة على سينما دال، اللي هتعرض النهاردة الفيلم الإسباني “Tango”. وده بتدور أحداثه عن “ماريو سواريز” اللي زوجته “لورا” بتسيبه. فيبدأ في الإعداد لفيلم عن التانجو. العرض هيبدأ الساعة 7:30 مساءً. والدخول مجانًا.
نيجي بقى لركن الفن الشعبي والتراث الأصيل، هنلاقي فرقة مزاهر بتقدم عرض الزار في مكان. العرض هيبدأ الساعة 8 مساءً. وسعر التذكرة: 40 جنيه.
أما لو انتم من هواة الأعمال الموسيقية العظيمة لفنانين زي باخ وداكوين، يبقى ميعادكم النهارده مع ريستال بيانو بتقدمه مشيرة عيسى على المسرح الكبير في دار الأوبرا المصرية. العرض هيبدأ الساعة 8 مساءً. سعر التذكرة من 25 لـ 50 جنيه.
يومكم بيضحك.
مقترح
فن وثقافة
طبلة الست.. فرقة غنائية بتنشر الفرح وتحيي التراث
حفلات طبلة الست حفلات غنائية في القاهرة +5
الحياة في كايرو
