النهارده في القاهرة: مسرح أفلام رسم ومزيكا.. يوم بلون الفنون
Cairo 360
يوم ورا يوم بيعدي، وكل يوم القاهرة دايمًا فيها جديد من أحداث وفعاليات مختلفة. وكالعادة بتلاقوها في أجندة كايرو 360، اللي مش بيفوتها حاجة. فتعالوا نشوف عندنا إيه النهارده:
نبدأ كده بداية مسرحية مع فرقة الحلم اللي هتقدم مسرحية “إذاعة الأغاني” على مسرح قاعة الحكمة في ساقية الصاوي. فرقة الحلم اتأسست عام 2015 وقدمت عروض كتيرة منها: الفيل الأزرق، والأسياد. العرض هيبدأ الساعة 7 مساءً. وسعر التذكرة: 15 – 20 جنيه.
في بلكون هليوبوليس هيكون لنا ميعاد مع الدراما الأمريكية وفيلم “Mother of George”. الفيلم إنتاج 2013 وبيحكي عن زوج وزوجة من نيجيريا، وعايشين في بروكلين. بيواجهوا مشكلة صعبة في إنجاب طفل. الأمر اللي بيضطرهم ياخدوا قرارات ممكن تغير مصيرهم. العرض هيبدأ الساعة 7 مساءً. سعر التذكرة: 25 جنيه.
أما لو دماغك وخداك للفرفشة والمزيكا، يبقى تروح على مكان وتحضر حفلة “دايرة الطبول” مع المدرب وليد عبده. بتشارك فيها بالطبلة الخاصة بك، ولو مش معاك بيوفروا لك واحدة. الحفلة هتبدأ الساعة 7 مساءً. سعر الاشتراك: 50 جنيه.
في تحرير لاونج تقدروا تستمتعوا بأجمل اللوحات الزيتية، في معرض “المرأة بألوان الزيت”. اللوحات هي نتاج ورشة الرسم اللي نظمها المشروع في شهر ديسمبر الماضي. الدخول مجانًا، وبيبدأ الساعة 3 مساءً.
انبسطوا على قد ما تقدروا
مقترح
الحياة في كايرو
المونوريل والقطار السريع والـLRT.. اعرف الفرق بين وسائل النقل الجديدة في القاهرة
القطار السريع القطار الكهربائي الخفيف LRT +4
فن وثقافة
