النهارده في القاهرة: فن وسيما وباليه وتياترو.. فيها حاجة حلوة
Mohammed Sabry
مساء الفل على أهل القاهرة الحلوين. الجو بقاله كام يوم كده شادد حيله علينا في البرد، ومخلي الواحد هاين عليه مايروحش الشغل حتى. بس على مين؟ ده الواحد يقوم مخصوص لما يعرف الحفلات اللي مستنياه في السهرة من أجندة كايرو 360. تعالوا ناخد لفة:
نبدأ مع الفيلم اللي عامل قلق من ساعة ما اتعرض “20 سبتمبر”، أو المعروف باسم هدية من الماضي. الفيلم مكمل في سينما زاوية للأسبوع الرابع. حفلات 5 و10 مساءً. مش بس كده الفيلم كمان معروض النهارده في سينما بلازا في الشيخ زايد، حفلة 6 مساءً.
ومع مود الأفلام مكملين في بلكون هليوبوليس اللي هيعرض الفيلم السويدي “A Man Called Ove”. اللي بيحكي عن راجل عجوز متقاعد بيعيش حياة روتينية عادية، لحد ما تنشأ صداقة بينه وبين جاره الجديد. العرض هيبدأ الساعة 7:30 مساءً. وسعر التذكرة: 25 جنيه.
نروح بقى لساقية الصاوي اللي بتستضيف النهارده العرض المسرحي “الحياة سيكودراما”. العرض بتقدمه فرقة الأحلام على مسرح الحكمة الساعة 6 مساءً. وسعر التذكرة: 15 جنيه.
ومن الساقية ننطلق إلى دار الأوبرا المصرية، وفيها فرقة باليه أوبرا القاهرة هتقدم عرض “كسارة البندق” على المسرح الكبير. ده هيكون الساعة 8 مساءً. وسعر التذكرة: 75 – 100 – 150 جنيه.
دي كانت جولتنا النهاردة في حفلات القاهرة، ولسه اللي جي أحلى. انبسطوا.
مقترح
الحياة في كايرو
المونوريل والقطار السريع والـLRT.. اعرف الفرق بين وسائل النقل الجديدة في القاهرة
القطار السريع القطار الكهربائي الخفيف LRT +4
فن وثقافة
