النهارده في القاهرة: عروض مهرجان الموسيقى العربية وحفل زار وعرض التنورة وعرض مسرح
Cairo 360
نسمات الشتا الأولى بدأت تلاعب وشوشنا والجو بيحلو آهو، مش نخرج بقى؟ فين وإمتى دي علينا، معروفة.
اليوم ماينفعش يبدأ غير من عند فعاليات مهرجان ومؤتمر الموسيقى العربية اللي بيحتفل بيوبيله الفضي على كل المسارح التابعة لدار الأوبرا في القاهرة بمشاركة عمالقة الغناء والموسيقى العربية في مصر والوطن العربي كله، النهارده الفعاليات هيستضيفها المسرح الكبير بدار الأوبرا بالجزيرة مع مسرح معهد الموسيقى العربية برمسيس، سهرة المسرح الكبير بدار الأوبرا هتبدأ من الساعة 8:00 وهتستمر لحد منتصف الليل تقريبًا وهتتضمن فقرات غنائية جماعية وفردية، بالإضافة لفقرات عزف موسيقى منفرد، سعر تذكرة الحضور 100 – 200 – 350 جنيه، وفي نفس الوقت تقريبًا (8:00 مساءً) هتبدأ برضه فقرات سهرة مسرح معهد الموسيقى العربية اللي هيشارك فيها فرقة دوم تك شو وفرقة سحر الشرق، وسعر تذكرة حضورها 50 جنيه.
وزي ما اتعودنا في الأربعاء الأول من كل شهر ميلادي بيستضيف المركز المصري للثقافة والفنون "مكان" فرقة "مزاهر" لفنون الزار، الفرقة اللي أعادت للفن الشعبي جزء من قيمته الجمالة والجماهيرية، الحفل هيبدأ في تمام الثامنة مساءً، وسعر تذكرة الحضور 30 جنيه.
في حين هتستضيف وكالة الغوري في موعد متجدد عرض التنورة في تمام السابعة مساءً، سعر تذكرة الحضور 5 جنيهات للمصريين و 30 جنيه للأجانب.
ونختم من مسرح الهوسابير اللي هيستضيف العرض المسرحي "الحضيض" اللي هيتعرض أخيرا بعد سلسلة من التأجيلات والإلغاءات، العرض بتقدمه فرقة مسرح كلية الهندسة بجامعة القاهرة، هيبدأ في تمام السادسة والنصف مساءً وسعر تذكرة حضوره 20 جنيه.
يسعد أوقاتكم.
