النهارده في القاهرة: سينما وعرض مسرحي و”حلقة ذكر”!
Cairo 360
أبريل داخل علينا وشادد حيله في الحر. بس حر بقى ولا برد مش فارقة، طالما أجندة كايرو 360 فيها كل الخروجات والحفلات. تعالوا نشوف الجديد منها:
رووم آرت سبيس في الزمالك هيعرض الفيلم الإيراني “The Salesman”. الفيلم بيدور عن حياة زوجين، بيضطروا يسيبوا بيتهم القديم ويأجروا شقة جديدة صغيرة. وبيتعرضوا لعدد من الضغوطات والمشاكل، بتحول حياتهم لسلسلة من الصعوبات. الفيلم ده حاصل على جائزة أوسكار أحسن فيلم أجنبي. العرض هيكون الساعة 8 مساءً. سعر التذكرة: 25 جنيه.
مشروع مسرح الحقيبة هيقدم العرض المسرحي “حسب الله السابع عشر” في شارع المعز. العرض تحت رعاية صندوق التنمية الثقافية، هيبدأ الساعة 4 عصرًا. والدخول مجانًا.
أما الناس اللي غاوية مدح وسلطنة، لهم ميعاد مع فريق “حلقة ذكر”. اللي هيقدم حفلة إنشاد ديني على مسرح الحكمة في ساقية الصاوي. الحفلة هتبدأ الساعة 7:30 مساءً. سعر التذكرة: 25 – 30 جنيه.
يومكم سعيد.
