The Definitive Guide to Living in the Capital , Cairo , Egypt

النظرية بتقول أنه أول يوم شغل بعد الإجازات الطويلة بيبقى متعب جدًا وتقيل بزيادة، علشان بنبقى بالبلدي كده لسه مش واخدين فورمة الشغل ولسه مريحين بدنيًا وذهنيًا.. وبما أننا النهارده كلنا تقريبًا بنعدي بالحالة دي، فهيكون ضروري جدًا نشوف لنا سكة نفك بيها ونخلي اليوم يقفل قفلة لطيفة وسعيدة، نروح نقلب بقى في أجندتنا ونشوف القاهرة عاملة لنا إيه النهارده كواجب "استعادة فورمة" بعد إجازة العيد الطويلة، يللا بينا.

الحدث الأبرز في اليوم هيكون من أراضي دار الأوبرا المصرية اللي هتستضيف في قاعتها الكبرى حفل موسيقي للموسيقار الكبير "عمر خيرت"، الحفل هيبدأ في تمام الثامنة مساءً، وأسعار تذاكر حضوره بتبدأ من 150 جنيه.

ييجي في المرتبة الثانية حدث فني آخر من قلعة أخرى من قلاع الفن في العاصمة، من ساقية الصاوي، اللي هيستضيف مسرح قاعة الحكمة فيها حفل إنشاد ديني للمنشد الشاب محمد عاطف وبطانته، سعر تذكرة حضور الحفل 25 جنيه، وبدايته هتكون 7:00 مساءً.

أما في المساحة الثقافية هيغرد فيها منفردًا مركز الربع الثقافي في شارع المعز بتمديده لفترة معرض الكتاب المقام فيه من بداية الشهر، المعرض اللي كان مفترض نهايته يوم 15 الماضي هيكمل معانا لحد آخر أيام سبتمبر، فعاليات المعرض بتفضل مستمرة من 10:00 صباحًا لـ 10:00 مساءً يوميًا، وأسعار الكتب بتبدأ من جنيه واحد لحد عشرين جنيه.