The Definitive Guide to Living in the Capital , Cairo , Egypt

بننبسط أول ما التنوع يرجع تاني يسود الموقف في فعاليات أجندتنا اليومية، وبنطمن أنه كل صاحب ذوق ومزاج هيلاقي عندنا اللي يناسب ذوقه ويرضي مزاجه.

نحب ننحاز للفعالية الرياضية اللي مشرفة أجندتنا النهارده ونخليها في البداية، مجموعة "Night Runners" هتنظم الجرية الثابتة أسبوعيًا ليها المرة دي في الزمالك، نقطة التجمع هتكون قدام "Emperial Boat"، وبداية التحرك هتكون في تمام السابعة والنصف مساءً، وباب المشاركة مفتوح للجميع.

ضيف آخر عزيز على الأجندة من حديقة الأزهر، مجموعة "سيركس" وعرضها في مسرح الجنينة اللي بييجي كنتاج عمل مشترك للعديد من الفنانين الاستعراضيين من مصر وألمانيا وفرنسا، العرض هيتضمن فقرات سيرك واستعراضات فكاهية ومسرحية، الحضور مجاني غير شامل تذكرة دخول الحديقة، والبداية في تمام الثامنة مساءً.

بعد كده نروح لفعاليات المسرح اللي هيكون أهم ما فيها عودة العرض المسرحي "الخلطة السحرية للسعادة" في موسمه الثاني على مسرح الهناجر بعد نجاح وقبول كبيرين في موسمه الأول، البداية هتكون في تمام الثامنة مساءً، وسعر تذكرة الحضور 20 جنيه، و 10 جنيهات للطلبة.

وفي فعاليات المسرح برضه هنكون على موعد متجدد ومستمر من فترة في مسرح الهوسابير مع العرض المسرحي "البروفة" اللي بيقدمه الفريق الشبابي صاحب العرض الشهير "1980 وانت طالع"، سعر تذكرة الحضور 25 جنيه، والبداية في تمام الخامسة مساءً.

أما عن الفعاليات الموسيقية فمسرح قاعة النهر بساقية الصاوي هيكون بطلها باستضافته لحفل فرقة "الجميزة"، الحفل هيبدأ في تمام السابعة والنصف مساءً، وسعر تذكرة حضوره 30 جنيه.

ونختم مع عروض الأفلام اللي أولها هيكون من المقطم في سينما دكّة التابعة لمؤسسة التعبير الرقمي العربي "أضف"، اللي هتستضيف عرض فيلم "White Material"، الدعوة عامة، والبداية في تمام السابعة مساءً.
ثاني عروض السينما هتكون من سينما زاوية في وسط البلد اللي هتختتم بعرض النهارده سلسلة عروضها لأبرز أفلام المخرج الراحل محمد خان، البداية في تمام السابعة والنصف مساءً، والتذكرة بـ 25 جنيه.

مساكم سعادة.