النهارده في القاهرة: تشكيلة فن على ثقافة ترضي كل الأذواق
Mohammed Sabry
السنة الجديدة قربت يا جماعة. في اللي بيرتب إزاي يحتفل بنهاية 2016، واللي مشغول بترتيب أولوياته في 2017. بس من وسط كل دول، إحنا مانسيناش أجندة الحفلات بتاعت كل يوم من كايرو 360. تعالوا نشوف عندنا إيه النهارده.
نبدأ من دار الأوبرا المصرية مع فرقة باليه أوبرا القاهرة اللي بتقدم عرض “كسارة البندق” لليوم الثالث على التوالي. وطبعًا بمشاركة أوركسترا أوبرا القاهرة. العرض هيبدأ الساعة 8 مساءً. وسعر التذكرة من 75 لـ 150 جنيه.
ومن الباليه نروح للتراث والفن الشعبي مع فرقة مزاهر، اللي هتقدم عرض الزار في مكان. وده نوع من الفن بتحتل فيه المرأة دور أساسي. العرض هيكون الساعة 8 مساءً. وسعر التذكرة: 30 جنيه.
في بيت السناري هيكون ميعادنا مع ندوة خاصة عن التصوير الإسلامي في منطقة النوبة. وهتشمل مدخل تعريفي عن النوبة وتاريخها والحضارات اللي مرت عليها. الندوة هتبدأ الساعة 6 مساءً. والدخول مجانًا.
نطلع بقى من مود الثقافة، ندخل في مود الأفلام. وده هيكون مع سينما دال في جاردن سيتي، اللي هتعرض الفيلم الإيطالي “The Legend of 1900”. الفيلم بيتكلم عن شخص اتولد وعاش طول عمره على سفينة واسمه (1900). العرض هيكون الساعة 7:30 مساءً. والدخول مجانًا.
يومكم بيضحك.
مقترح
الحياة في كايرو
المونوريل والقطار السريع والـLRT.. اعرف الفرق بين وسائل النقل الجديدة في القاهرة
القطار السريع القطار الكهربائي الخفيف LRT +4
فن وثقافة
