The Definitive Guide to Living in the Capital , Cairo , Egypt

النهارده في القاهرة فيه أنشطة وحفلات كتير، تقدروا تعرفوها كلها من هنا.. لكن من بين الحفلات دي اختارنا نكلمكم عن حفل فرقة مزاهر اللي هيستضيفه مكان.. واللي تقدروا تعرفوا تفاصيله من هنا.

الحقيقة إن مزاهر فرقة مميزة.. بقى لها سنين بتقدم أغاني شعبية من التراث، ومكانهم المفضل لإقامة حفلاتهم هو “مكان” المركز المصري للثقافة والفنون في وسط البلد.

نبدأ بالريسة أو كودية الزار الست مديحة أو أم سامح اللي بدأت تغني من وهي عندها 11 سنة في الصعيد مع والدتها اللي برضه كانت ريسة زار. واختارت اسم مزاهر من كل زائر أو ضيف بيزور الزار فيبقى زائر مزاهر. وبرغم إنها ورثت المهنة من والدتها إلا إن ولا واحد من ولادها ورثها منها خاصة إنها تعبت جدًا لحد ما ربيتهم وسط تحديات المهنة اللي عانت منها.

أما عن صاحب فكرة الفرقة والشخص اللي كون أعضائها فهو الدكتور “أحمد المغربي”، واللي  قدر يوصل الفرقة للعالمية ويخليهم يعملوا عروض مختلفة على مدار سنين في فرنسا وبلجيكا وإيطاليا.

كمان الريسة “أم سامح” بتحاول تصحح فكرة الزار التقليدية اللي نقلها التليفزيون وبتقول إن الزار فن شعبي مالوش علاقة بالزار القديم اللي صورته اتنقلت للناس، خاصة وأنهم طوروه وجددوا فيه، حتى  تلاقي أعضاء الفرقة من محافظات مختلفة من الصعيد وبرغم إن منهم أميين إلا أنهم أضافوا ألوان جديدة لفنون الزار ماكنتش موجودة قبل كده. فتلاقيهم معتمدين على أكتر من لهجة  فى فنهم زي النوبية والصعيدية والشعبية، وده  خلاهم متميزين ومنفردين باللي بيقدموه.