النهارده في القاهرة: إثارة وأكشن مع دراما ومشاعر.. الأفلام تكسب
Cairo 360
كل صدمة بنقابلها مهما كانت كبيرة، بنقدر نتغلب عليها ونكمل من جديد. وده بيخلينا دايمًا أقوى. وعلشان نخرج من حالة الحزن، تعالو نشوف الجديد في أجندة كايرو 360:
سينما مجنوليا في الزمالك، هتعرض النهارده فيلم “Léon: The Professional”. الفيلم بيدور عن بنت صغيرة اسمها “ماتيلدا” بتضطر تعيش مع قاتل محترف “ليون”، بعد ما أسرتها اتقتلت. ومع الوقت هو اللي بيتولى حمايتها. العرض هيبدأ الساعة 7 مساءً. والدخول مجانًا.
وسينما دال في جاردن سيتي، هتعرض الفيلم لإيراني “The Salesman”. اللي بيدور عن زوجين حياتهم بتبدأ بالانحدار، أثناء أدائهم لأدوار تمثيلية، في مسرحية “موت بائع متجول”. للكاتب آرثر ميلر. العرض هيبدأ الساعة 7:30 مساءً. الدخول مجانًا.
أما في ساقية الصاوي، فقاعة الحكمة هتستضيف عرض فيلم “هدية من الماضي”، أو المعروف باسم 20 سبتمبر. وقصته بتتكلم عن هدية بنت لباباها في عيد ميلاده، اللي هي عبارة عن تذكرتين سفر لروما. علشان يروح يدور على حبه القديم. العرض هيبدأ الساعة 8 مساءً. سعر التذكرة: 20 – 25 جنيه.
فرقة مزاهر هتقدم عرض الزار المصري في مكان. واللي بيقوم على مجموعة من الأغاني التراثية وبعض الرقصات. العرض هيبدأ الساعة 8 مساء. سعر التذكرة: 40 جنيه.
يومكم مليان سعادة.
