The Definitive Guide to Living in the Capital , Cairo , Egypt

الصورة الرئيسية تصوير: محمد ربيع

ممكن نعتبر العتبة والموسكى أكتر منطقتين تجاريتين بيعانوا من مشاكل الزحام وعدم التنظيم في القاهرة، وأكيد كلنا شوفنا أخبار كتير عن كوارث حصلت في المنطقتين في السنين اللي فاتت، زي الحرائق. فهل الحكومة المصرية بتفكر في تطوير المنطقتين دول؟ بالتأكيد أيوة، لكن بحسب تقرير حديث نشره موقع اليوم السابع، واحدة من التحديات اللي بتواجه محافظة القاهرة في تطوير العتبة والموسكي هي أزمة ازدحام المنطقتين، وده بسبب طبيعة المنطقة التجارية واللي بتجذب آلاف الباعة الجائلين، وده السبب في إن المنطقتين مقصد لمئات الآلاف من المواطنين من سكان القاهرة والمحافظات القريبة منها.

وبتضم مناطق العتبة والموسكى آلاف المحلات وعلى رأسها محلات الملابس. والعتبة مقسمة لعدة مناطق كل واحدة منها بتتخصص في سلعة أو منتج معين، والكم الهائل من المحلات ده واللي بتقدر بمليارات الجنيهات خلى التعامل مع ملف تطوير منطقة العتبة حساس للغاية.

تعالوا نتعرف على خطة محافظة القاهرة لتطوير وإعادة تنظيم 2 من أهم المناطق التجارية في العاصمة المصرية من خلال 4 نقاط:

1 – رغم الصعوبة في التعامل مع أزمة ازدحام العتبة، إلا أن محافظة القاهرة عندها خطط مختلفة للتعامل مع الأزمة، منها تخصيص أماكن قريبة كبديل للعتبة علشان تضم كافة الأنشطة الموجودة بالعتبة والموسكي، علشان تكون بديل للمستهلك للشراء منها، لكن مشكلة الخطة دي إنها هتحتاج لميزانية ضخمة وجهد كبير، بالإضافة للمشاكل المتعلقة بنقل الباعة أو تعويض المحلات، واقناع أصحابها بالأماكن البديلة.

2 – الخطة التانية اللي ممكن تتنفذ هي استمرار أسواق العتبة والموسكي في أماكنهم الحالية، وتنفيذ خطة لتطوير المنطقة وإعادة تنظيمها بشكل يتناسب مع البعد التراثي والجمالي للمنطقتين، من خلال تقسيمها لأسواق متخصصة بكل سلعة وتنفيذ باكيات منظمة للبائعين.

3 – وبخصوص المحلات اللي بتمارس أنشطة خطرة بتهدد المنطقة بالحرائق زي مغالق الأخشاب القريبة من منطقة العتبة، فمحافظة القاهرة بتستعد لنقلها خارج العاصمة، وكان آخر حصر رسمي ليها هو 300 مغلق، منتشرة في 3 أحياء مختلفة قريبين من العتبة والموسكي، وبيتم حاليًا تجهيز ورش بديلة بمدخل القطامية من طريق العين السخنة.

4 – ومشروعات تطوير منطقة العتبة هتشمل كمان الشوارع الرئيسية، ومن المقرر تشمل خطة تطوير القاهرة الخديوية ميداني العتبة والأوبرا، وحاليًا فيه لجنة شغالة في دراسة تطوير الميادين دي بما يتناسب مع الطراز المعماري للمنطقة.